tomo tawa sewi
_-_15.JPG)
tomo tawa sewi li ilo pi tawa ijo. ona li tawa sewi li tawa anpa. ona li tawa e jan li tawa e ijo. tenpo mute la, tomo ni li lon tomo suli. jan li lon tomo suli li wile tawa supa ante pi tomo ni la, jan li tawa insa tomo tawa sewi, li luka e nena pi supa wile ona. lupa pi tomo tawa sewi li pini, li poki e jan. tomo tawa sewi li tawa supa pi wile jan.
tomo tawa sewi li tawa lon nasin awen taso. tenpo mute la, ona li ken tawa sewi li ken tawa anpa taso. taso, tenpo lili la, ona li ken tawa poka. ona li tawa tan ni: ilo wawa li tawa sike e ilo sike. linja li sike lon selo pi ilo sike ni. linja ni li jo e ijo tu lon pini ona. tomo tawa sewi li lon pini wan. ijo suli li lon pini ante. suli pi ijo ni li sama suli pi tomo tawa sewi. ilo sike li tawa sike la, linja li tawa e tomo tawa sewi li tawa ante e ijo suli. tawa ni li sewi e ijo wan li anpa e ijo ante lon pini linja.
tomo tawa sewi li tawa e ijo mute. tenpo mute la, ona li tawa e jan. taso, tomo tawa sewi pi tawa ijo li tawa ala e jan. tomo tawa sewi pi tawa ijo li tawa e moku, e pan, e ilo, e tomo tawa ante, e ijo ante mute.