toki ilo Sewasi
 | lipu ni li wile e pali tan ni: tan sona li lon ala. sina ken pona e ona. |
toki ilo Sewasi (toki Inli la: Scratch) li toki ilo lukin(?) leko tawa jan lili. ona la jan mute li pali e musi mute. ona la leko lili li toki tawa ilo. ni la jan li ken nasin e leko ni li ken pali e nasin ilo.
toki ilo Sewasi li lon toki 70 anu toki pi mute namako. jan mute pi ma mute li kepeken ona lon tomo sona lon tomo awen. toki ilo Sewasi li wile ala e mani lon kepeken.
nasin kepeken
[o ante | o ante e toki ilo]ilo ante lukin pi toki ilo Sewasi la ijo suli tu wan li lon. ona li sitelen musi, li leko ale, li leko pali. jan kepeken li ken kama jo e leko tan kulupu leko kepeken ilo luka, li ken pana e ona tawa pali lon insa, li ken lukin e ijo pali ona lon poka ante pi ilo sitelen kepeken lipu palisa laso anu ni: ona li kepeken ilo nena lon leko.
sitelen musi li pana e ijo kama (sama sitelen tawa, sama sitelen nanpa. ni li ken lili anu nasin ilo. kepeken nena la sina ken suli e ona kin). kulupu pi sitelen ale kepeken li lon anpa ni. sitelen li kepeken ale pi nasin nanpa tu. nanpa tu li lon li toki e ni: sitelen sina li lon seme? sitelen sina li tawa poka pi open sitelen ilo la, nanpa wan li kama lili (anu weka). ona li tawa poka ante la, nanpa sama li kama suli. ni li jo e sitelen "x". sitelen sina li tawa anpa la, nanpa wan li kama lili (anu weka). ona li tawa sewi la, nanpa sama li kama suli. ni li jo e sitelen "y". nanpa "x" li nanpa wan la nanpa "y" li nanpa tu la insa pi sitelen ale li lon nanpa 0, lon nanpa 0.
sina jo e sitelen lon anpa la, leko pi toki ilo li ken lon kepeken nasin ni: sina tawa e ona tan leko ale tawa poki pi leko pali. nena sewi "sitelen" li ken e ante lon sitelen. ona li ken kepeken nasin pi wan sitelen mute anu nasin pi sitelen nanpa. ni la, sitelen tawa en ijo sama li ken. nena sewi "kalama" li ken e kalama tawa sitelen.
jan kepeken li sitelen e sitelen lili anu sitelen monsi la, ona li ken sitelen e sitelen ona tan ala, anu kama e sitelen tan kulupu, anu kama e sitelen tan ilo sona ona.
sitelen ni li pana e kulupu ale pi leko toki:
| kulupu | sitelen | |
|---|---|---|
| tawa | leko pi kulupu ni li tawa e sitelen, sama tawa sike, sama tawa ante. | |
| ijo lukin | leko pi kulupu ni li lawa e ijo lukin sitelen. | |
| kalama | leko pi kulupu ni li kalama li ante e ona. | |
| kama | leko pi kulupu ni li pali tan kama li pana e kama. | |
| lawa | leko pi kulupu ni li pali tan alasa, li sike e pali, li ken pali e sitelen sama. | |
| pilin | leko pi kulupu ni li pilin lon sitelen, lon ilo luka pi ilo sona, lon sitelen monsi. | |
| ante nanpa | leko pi kulupu ni li ante e nanpa li wan e sona mute li alasa e sama e ante. | |
| poki sona | leko pi kulupu ni li kama jo e sona li ante e sona tan poki sona. poki sona li ken lon ilo weka la ona li sama lon pali musi ante ale. | |
| kulupu pi poki sona | leko pi kulupu ni li kama jo e sona li ante e sona tan kulupu poki. | |
| leko mi | jan li ken pali e leko. leko li kama lon kulupu ni. ona li ken kama jo e sona li ken pali kepeken ala sin sitelen. | |
| kulupu namako | kulupu namako (sama "ilo sitelen" sama "kalama musi") leko ni li ken kama lon tenpo ale. | |
kulupu kepeken en tenpo musi
[o ante | o ante e toki ilo]
toki ilo Sewasi la kulupu kepeken li lon. kepeken lipu ilo la, jan kulupu li ken pana e pali ona tawa jan ale; kin la, jan ante li ken pali e ijo sin tan pali ante.
tenpo suno luka tu pi toki ilo Sewasi (tenpo pini la, tenpo suno pi toki ilo Sewasi) li lon tenpo mun nanpa luka lon tenpo sike ale. ona la, kulupu suli pi jan pi toki ilo Sewasi li kama li musi.
tenpo suno musi pi tenpo mun nanpa 4 la, kulupu lawa pi toki ilo Sewasi li nasa e jan kepeken li pana e musi. tenpo sike wan la, ona li kute soweli e sewi pi leko pi kulupu "kama". ni li tan sama pi nimi "hat block" pi nimi "cat block" lon toki Inli.[1]
ijo tan ona
[o ante | o ante e toki ilo]toki ilo Sanpa
[o ante | o ante e toki ilo]toki ilo Sanpa (tenpo pini la, toki ilo BYOB) li toki ilo lukin leko tan toki ilo Sewasi.[2] taso, ni ale li ante:
- kulupu leko li ken lon insa poki. ni li ken e kulupu leko lon kulupu leko. nasin ona li sama nasin pi jan Lanta(?).[3]
- kulupu pi poki sona li ken lon insa pi kulupu ante pi poki sona.
- sitelen li sama sijelo, sama nasin pi toki ilo Pason anu nasin pi toki ilo Lupi.
toki ilo Sewasi lili
[o ante | o ante e toki ilo]tenpo mun nanpa 7 pi tenpo sike nanpa 2014 la, toki ilo Sewasi lili li kama lon ilo Apata.[4] tenpo sike nanpa 2015 la, ona li kama lon ilo Antowi.[5] tenpo sike nanpa 2016 la, ona li kama lon ilo kon lawa Kulon. ona li kama e ijo mute tan toki ilo Sewasi. taso, ona li tawa jan pi lili namako (sike 5-7).[4]
linja tawa
[o ante | o ante e toki ilo]- https://scratch.mit.edu - lipu ilo pi toki ilo. ona la jan li ken pana e nasin ilo tawa kulupu, li ken ante e nasin ilo, li ken toki pi wile sona.
- https://lab.scratch.mit.edu/ - lipu ni la kulupu lawa pi toki ilo Sewasi li pali e leko sin. ken la, ona li kama lon toki ilo Sewasi lon tenpo kama; ken la ona li kama ala.
- https://en.scratch-wiki.info/wiki/ - lipu ni la jan li ken kama sona e toki ilo Sewasi. ona li kepeken nasin Wiki.
tan sona
[o ante | o ante e toki ilo]- ↑ エイプリルフール (lon toki Nijon). lukin lipu li lon tenpo 2026-09-05.
- ↑ About | Snap! Build Your Own Blocks. lukin lipu li lon tenpo 2026-09-04.
- ↑ Snap! (lon toki Inli). 2025-08-20. lukin lipu li lon tenpo 2026-09-04.
- 1 2 ScratchJr: Coding for kindergarten (lon toki Inli). 2014-07-30. lukin lipu li lon tenpo 2026-09-04.
- ↑ Todd Ogasawara (2015-12-04). Get 5-7 year olds programming with PBS Kids ScratchJr on a tablet (lon toki Inli). lukin lipu li lon tenpo 2026-09-04.