toki Tokalijan
| toki Tokalijan | |
|---|---|
 | |
| lipu sitelen majuna kepeken toki Kusi | |
| ma | ma Sinkijan lon tenpo pini |
| kulupu toki | Palata Elopa |
| nasin sitelen | sitelen Tokalijan |
| nanpa toki | |
| Glottolog | tokh1241 |
 | |
| kulupu toki Tokalija lon ma Asija. loje la o sona e ni: toki li lon ma ni. walo la o sona e ni: toki li ken lon. | |
tenpo pini la, kulupu Tokalijan li kepeken nasin toki tu. toki ni li lon kulupu sama lon kulupu toki Palata Elopa. toki wan li toki Alisi anu toki Tokalijan nanpa wan. toki ante li toki Kusi anu toki Tokalijan nanpa tu.
jan pi nasin toki li sona e toki Tokalijan tan lipu majuna tan ma Takamakan lon ma Sinkijan. toki ni li kama moli lon poka pi tenpo sike nanpa 1000. jan li sitelen e toki kepeken sitelen Tokalijan.
nasin sona
[o ante | o ante e toki ilo]jan sona pi tenpo majuna tan ma Elopa li alasa lon ma Sinkijan lon poka pi tenpo sike nanpa 1900. jan Ajule Sin en jan Ape Wonleko en jan Po Pelo li lawa kulupu alasa lon ma Takamakan lon ma Sinkijan. ona li kama jo e lipu majuna mute. lipu ni li kepeken toki Ilan pi majuna meso, li kepeken e toki ante. jan sona li sona ala e toki ni. tenpo sike nanpa 1908 la, jan tu pi sona lipu tan ma Tosi li lukin e lipu ni, li toki e ni: ona li tan toki pi kulupu toki Palata Elopa, li tan kulupu toki Insojilanijan ala.[1]
sona pi toki Tokalijan li nasa mute tawa jan pi sona toki tan ni: ona li lon kulupu kalama Kentun lon kulupu toki Palata Elopa. toki ante pi kulupu mama ona lon poka li toki pi kulupu kalama Sentun. [2] ni la, tenpo open la, jan pi sona toki li pilin e ni: toki Tokalijan li sama toki pi kulupu Palata Elopa tan ma Elopa. taso, tenpo lon la, jan li pilin ala e ni. ona li pilin e ni: toki Tokalijan li ante tan toki mama Palata Elopa lon tenpo pi majuna mute. majuna la, ona li kulupu toki nanpa tu lon kulupu toki ona. kulupu toki Anatolija taso li majuna tawa ona.[1]
toki
[o ante | o ante e toki ilo]toki Tokalijan tu li kepeken nasin sama. taso, ona li sama ala. jan li toki Tokalijan nanpa tu taso la, ona li ken ala sona e toki sitelen kepeken toki Tokalijan nanpa wan.[1]
toki Tokalijan li jo e kule nimi tu. ni li kule mije, li kule meli. nimi ijo en nimi ante li ante tan mute wan, tan mute tu, tan mute mute. ona li mute la, nimi ijo pi kule mije li ken kama kule meli.[1]
toki Tokalijan nanpa wan
[o ante | o ante e toki ilo]
tenpo pali pi lipu sitelen Tokalijan la, jan li toki Tokalijan nanpa wan lon tenpo lili. ona li sitelen e ona tan nasin sewi, li toki e toki Tokalijan nanpa tu anu toki Tuki majuna lon tenpo ante.[1][2]
toki Tokalijan nanpa tu
[o ante | o ante e toki ilo]toki Tokalijan napa wan la, lipu kepeken toki Tokalijan nanpa tu li ken ante mute. jan li sitelen e toki Tokalijan lon lipu, lon sinpin kiwen. kin la, ona li pali e toki musi kepeken ona. toki ni li kama moli lon poka pi tenpo sike nanpa 1000.[1]
sitelen toki
[o ante | o ante e toki ilo]toki Tokalijan tu li kepeken e sitelen Tokalijan. nasin sitelen ni li tan sitelen Pami tan ma Palata. taso jan Tokalijan li ante e sitelen Pami. ona li mama e sitelen sin tan ni: ona li wile sitelen e kalama ante.[1]
tan sona
[o ante | o ante e toki ilo]- 1 2 3 4 5 6 7 jan Pi Kon en jan Sala Okili lon lipu nanpa 1068–1070
- 1 2 jan Ko Kanpe en jan Kawe Kin lon lipu nanpa 1689
lipu
[o ante | o ante e toki ilo]- jan Ki Pon en jan Sala Okili (toki Inli la: Keith Brown, Sarah Ogilvie) li toki e ni lon lipu lili pi toki lon ma ale (toki Inli la: Concise Encyclopedia of Languages of the World) tan kulupu Elsiwe (toki Inli la: Elsevier) lon tenpo sike suno nanpa 2009.
- jan Ko Kanpe en jan Kawe Kin (toki Inli la: George Campbell and Gareth King) li toki e ni lon lipu sona pi toki ale nanpa tu wan (toki Inli la: Compendium of the World's Languages, 3rd Edition) tan kulupu Wole (toki Inli la: Routledge) lon tenpo sike suno nanpa 2013.
 | lipu ni li wile kama lipu pona. sina ken toki pi lipu ni. |