suli pi sitelen wan toki

sitelen A lili li loje. sitelen A suli li jelo. ni lili li lon sinpin pi ni suli.

suli pi sitelen wan toki la, sitelen wan toki li ken lon kulupu suli, li ken lon kulupu lili. nasin pi sitelen toki li jo e ijo ni la, sitelen wan toki ale ona li wile jo e nasin tu. nasin nanpa wan li lon kulupu suli; nasin nanpa tu li lon kulupu lili. taso, ona tu li jo e kalama sama. sijelo ona taso li ante.

ni li sama ni: sitelen Lasina la, mu pini kalama pi selo tu pi nena kon li kepeken sitelen ni: lili la: ⟨n⟩, suli la: ⟨N⟩. kalama pi sitelen ni tu li sama. tenpo mute la, jan li sitelen kepeken ni lili. taso, ona li wile sitelen e sitelen wan nanpa wan lon toki; anu sitelen wan nanpa wan lon nimi; anu pali e ijo ante; anu wile toki suli anu toki wawa e sona la; ona o kepeken ni suli.