soweli pona tan ma Ponopekase

kiwen sijelo tan soweli pona tan ma Ponopekase lon tomo Linise Lantemusejun Pon

tenpo sike suno nanpa 1914 la jan pali li kama lukin e sijelo moli pi soweli pona tan ma Ponopekase (toki Tosi la, Hund von Bonn–Oberkassel) lon lupa kiwen^(?) lon ma Opekase^(?) pi ma Pon. sijelo soweli ni li lon poka pi sijelo jan tu. jan sona pi tenpo pini li kama sona e ni: sijelo tu wan ni li tan tenpo pini pi tenpo kiwen. tenpo lon ona li tenpo mun luka tu wan. ona li palisa sijelo lili.

tenpo open la, jan sona li pilin e ni: kiwen lawa ona li tan soweli Kani Lupu. ona li kipisi e poki pi kiwen ona. poki wan li jo e kiwen lawa ona, li tawa tomo pi ijo suli. kiwen ante ona li tawa poki pi tomo sona pi ma Pon^(?). lon poka pi tenpo sike suno 1978 la, jan pi kama sona lon tomo sona pi ma Pon li alasa e poki kiwen tu ni, li wan e ona. jan li open lukin sin e ona, li kama sona e ni: ona li soweli Kani Pamilijali tan kulupu Matalenijan^(?) lon tenpo pini pi tenpo lete suli nanpa pini. mi ale li sona e kiwen mute luka luka tu li tan soweli pona tan ma Ponopekase.

kiwen ona li pakala lili. kiwen uta ona la, mute lili li weka. ni la, soweli ni li pilin jaki mute lon tenpo lili ona. jan li awen ala e ona la, ona li moli lon tenpo ni. taso, ona li moli ala tan jaki ni. ni la, jan li awen pona e ona, li pana e moku, e telo tawa ona. ken la ona li soweli pona tawa jan ni. mi ale li sona ala e tan moi ona. ken la jaki li moli e ona. ante ken la, jan li moli e ona tan nasin sewi, li tawa ona tawa lon lupa moli pi jan tu.