soweli Didelphidae

soweli Tatepita (toki Lasina la: Didelphidae /daɪ.dɛl.fɪ.daɪ/) anu soweli Oposan anu soweli Posan li soweli pi nena mama li soweli pi poki mama pi kulupu Tatepimopija (toki Lasina la: Didelmorphia /daɪˌdɛlfɪˈmɔːrfiə/). ona li lon ma Amelika taso.

ma Mewika en ma Kanata la, soweli Oposan pi ma Wesinja li soweli Tatepita taso.

tan nimi

nimi Tatepimopija li kama tan toki Elena majuna. δι- (di-) li sama "tu", δελφύς (delphús) li sama "insa mama", μορφή (morphḗ) li sama "sijelo".

sona

soweli Tatepimopija li lili sama soweli Peli Katu. ona li moku e kasi e soweli e akesi e pipi. ona li jo e nena suli e lawa lili. nanpa pi kiwen uta ona li mute mute luka luka.

nasin

soweli Oposan li tawa mute li taso. moku en telo li lon la, ona li awen. pimeja li pona tawa ona.

ona li pilin ike anu ona li kama pakala la, ona li moli pi lon ala li sama soweli moli. ni la, ona li pana e kon jaki tan monsi ona.

linja monsi ona li sama luka li ken jo e ijo.

pilin ike la, ona li kalama kon. lili ona li poka mama ala la, ona li kalama kon kin, ni la, mama li kalama kiki.

moku

ona li moku e pipi, e soweli lili, waso, e sike mama, e akesi, e kasi, e kili, e pan. ona li ken moku e kiwen pi soweli lili. tomo jan la, ona li moku e ale.

soweli Tatepita mute li moli ala tan telo moli pi akesi linja li moku e akesi ni.