sona pi sijelo ijo

sona pi sijelo ijo li sona lon sona nanpa. ona la, jan li lukin e wan ma e linja e selo ijo e sijelo ijo, li wile sona e ni: seme la, ma ona li poka anu weka anu seme?

nasin

nasin pi jan Ekete

jan Ekete li jan pi sona nanpa tan ma Elina pi tenpo weka. ona li pali e lipu "wan noka" (toki Elina pi tenpo pini la: Στοιχεῖα) kepeken nasin pi alasa lon tawa sona pi selo ma. open lipu la, ona li toki e ni: "sona luka ni li lon li noka tawa sona ale:"

sina wile sitelen e palisa la, wan ma tu li pana e ma ona e nasin ona.
sina ken suli e palisa tawa suli wile.
sina wile sitelen e sike la, wan ma li pana e insa ona lon; palisa li pana e suli ona.
pini poka leko ale li sama.
[ni li sona noka lon tawa palisa pi nasin sama] palisa tu li lon la, o sitelen e palisa ante lon ona tu. poka wan pi palisa ante ni la, o lukin e suli pi pini poka tu lon ni. sina wan e suli pi ona tu la, suli ni li lili tawa pini poka leko tu la, sina suli e palisa tu open la, ona li tawa ma wan lon ma.

jan Ekete li pali tawa sona mute tan sona luka ni taso.

nasin pi jan Ekete ala

ijo

wan ma

wan ma li ijo noka lon sona ni. ona li ma wan taso: ma li lon poka ona la, ona li wan ma ante.

palisa

palisa li suli lon nasin wan taso. sina tawa lon palisa la, nasin sina li awen sama li sike ala. nasin pi jan Ekete ala la, palisa li ken lon ala.

lipu

lipu li suli lon nasin tu taso. mute la, nasin pi jan Ekete li kepeken lipu taso tan ni: jan li sona pona e ale lon lipu, ona li ken kepeken nasin lipu lon sijelo.

selo pi poka palisa

selo pi poka palisa li lon lipu li jo e poka palisa taso. lili nanpa wan la, ona li jo e poka tu wan, li selo pi poka tu wan.

ma sijelo

ma sijelo li pini ala li suli lon nasin tu wan. ona li jo e suli tan sinpin tawa monsi, li jo e suli tan poka tawa poka ante, li jo e suli tan anpa tawa sewi.

sijelo pi sinpin supa

sijelo pi sinpin supa li lon ma sijelo. ale pi sinpin ona li sike ala. ona li sama selo pi poka palisa, taso ona li lon ma pi nasin tu wan.