sitelen tawa Seku

kiwen pi monsuta Seku tan sitelen tawa Seku.

sitelen tawa Seku (toki Inli la: Shrek) li sitelen tawa tan tenpo 2001. kulupu SinWa (toki Inli la: DreamWorks, "pali lape") li pali e ona. jan Antaju Atanson (Andrew Adamson) en jan Piki Jenson (Vicky Jenson) li lawa e pali. sitelen tawa ni li sama lipu Seku! (toki Inli la: Shrek!) tan jan Wilijan Sa (William Steig). sitelen tawa ni la, monsuta Seku (Shrek) li lon tomo ona lon ma kasi li wile ala lon poka pi jan ante. taso, jan lawa ike Pakawa (Lord Farquaad) li lawa e ni: jan mute en soweli mute o weka tan ma ona o kama lon tomo pi monsuta Seku. ni li ike tawa monsuta Seku la, ona li alasa toki tawa jan Pakawa. monsuta Seku en jan Pakawa li esun. esun li ni: monsuta Seku li ken weka e jan Pijona (Princess Fiona) tan tomo suli la, ona li ken lawa sin e tomo ona e ma kasi ona.

sitelen tawa ni la seme li lon?

open la, monsuta Seku li lon tomo ona lon ma kasi li wile ala lon poka pi jan ante. jan lawa ike Pakawa li lawa e ma suli lon poka pi ma kasi. ona li lawa e ni: jan mute en soweli mute o weka tan ma ona. pakala la, monsuta Seku li weka e soweli wan tan lawa. soweli ni li ken toki li wile awen lon poka pi jan Seku lon tenpo ale. ni li tan wile soweli li tan wile pi monsuta Seku ala. jan mute en soweli mute li weka tan ma pi jan Pakawa la, ona mute li kama lon tomo pi monsuta Seku. ni li ike mute tawa ona la, ona li weka tan ma kasi ona li alasa toki tawa jan Pakawa li alasa pona e ike ni. soweli toki li kama lon poka ona tan ni: soweli li sona e nasin.

ma ante la, jan lawa Pakawa li lon tomo li toki tawa ilo jasima pi wawa nasa. ilo jasima li toki e ni: sina wile kama jan lawa nanpa wan la, sina o wan olin lon poka pi meli lawa. ni la, jan Pakawa li wile wan tawa jan Pijona tan ni: ona li meli lawa. taso, jan Pijona li lon weka mute li awen lon insa pi tomo suli. kin la akesi seli suli li awen insa e ona. ni li pali suli la, jan Pakawa li wile e ni: jan ante li weka e jan Pijona. ni la ona li pali e utala. utala li ni: jan li anpa e jan ale ante pi utala ni li kama nanpa wan la, ona li ken weka e jan Pijona. taso, ike la, tenpo utala la, monsuta Seku li kama lon. ni la, jan Pakawa li ante e nasin utala tawa ni: jan li ken moli e monsuta Seku la, ona li kama nanpa wan. taso monsuta Seku en soweli toki li kama nanpa wan li anpa e jan ante ale! jan Pakawa li pilin sama ni: monsuta Seku li wawa li ken weka pona e jan Pijona. ni la, monsuta Seku en jan Pakawa li esun. esun li ni: monsuta Seku li ken weka e jan Pijona la, jan Pakawa li weka e jan ale e soweli ale tan ma kasi Seku.

monsuta Seku en soweli toki li tawa tomo pi jan Pijona. tomo ni la, akesi seli suli li utala e ona. nasa la, akesi seli li kama pilin olin tawa soweli toki. ni la, monsuta Seku li weka e jan Pijona tan tomo. ni la, jan Pijona li kama pilin suwi tawa ona. jan Pijona li kama sona e ni: monsuta Seku li wile ala kama wan olin lon poka ona. ona li weka e ona tan ni taso: jan Pakawa li wile e ni. jan Pijona li pilin ike tan ni li toki e ni: jan Pakawa li wile wan olin tawa mi la, ona o weka e mi. ni la, ona li wile ala tawa tomo pi jan Pakawa. taso monsuta Seku li lanpan e sijelo ona la, ona li tawa tomo tan wile ona ala. tawa li suli la, ona o awen lon tenpo pimeja. tenpo lon poka pimeja la, ona tu li toki mute. monsuta Seku li toki e ni: jan mute li pilin ike tawa mi tan lukin mi. jan Pijona li sona e pilin ni la ona li kama pilin pona sin tawa monsuta Seku. tenpo pimeja li kama la, jan Pijona li len e ona lon insa pi lupa kiwen li wile e ni: jan ante ala li lukin e mi. ni li nasa tawa monsuta Seku. tenpo suno kama la, monsuta Seku en jan Pijona li utala e kulupu pi jan ike lon poka la, ona tu li kama pilin olin.

tenpo pimeja sin li kama la, jan Pijona li weka sin tan poka pi monsuta Seku pi soweli toki li len e ona lon insa tomo. taso soweli toki li kute ala e wile ona li kama lon insa tomo. ni la, ona li kama sona e ni: tenpo pimeja li kama la, jan Pijona li kama monsuta Pijona! monsuta Pijona li toki e ni: nasa ike ni la mi jaki mute a. taso mi wan olin la, nasa ike ni li weka. insa tomo ala la, monsuta Seku li kute ike e monsuta Pijona. ona li kute e ni: jan Pijona li toki e ni: monsuta Seku li jaki mute a. ni la, pilin olin ona li weka. tenpo suno kama la, monsuta Seku li pana e jan Pijona tawa jan Pakawa li weka tan pilin ike ona. jan Pijona li awen olin e ona la ona li pilin ike. taso, ona li toki e ni: mi ken kama wan olin lon poka pi Jan Pakawa tan ni: mi wile weka e nasa ike mi. monsuta Seku li kama sin lon ma kasi ona. taso ona li kama pilin ike tan weka pi jan Pijona. ni la, monsuta Seku en soweli toki li tawa jan Pijona sin. ona li tawa lon monsi pi akesi seli.

tomo sewi la, jan Pijona en jan Pakawa li kama wan. taso, monsuta Seku li kama lon li pini e wan ona. ona li toki e ni: mi olin e jan Pijona. suno li weka tan sewi la, jan Pijona li kama monsuta. jan Pakawa li kama pilin ike wawa la, ona li wile moli e monsuta Seku li wile awen sin e monsuta Pijona lon insa tomo. taso, pona la, akesi seli li kama li moku e jan Pakawa. monsuta Seku en monsuta Pijona li uta olin, taso monsuta Pijona li awen monsuta. taso monsuta ona li pona tawa monsuta Seku la, monsuta Pijona li pilin pona kin.