o tawa ijo lipu

sitelen nanpa pi leko walo pimeja

tan lipu lipu Wikipesija
sitelen jan li len e sitelen leko ni, taso ona li awen pana e sona

sitelen nanpa pi leko walo pimeja (toki Inli la: QR, quick recognition[1], "pana sona kepeken tenpo lili") li sitelen ilo li ken pana e sona pi nasin mute tawa ilo nanpa kepeken ilo lukin. jan pi kulupu Tenso (toki Nipon la: 株式会社デンソー) pi ma Nipon li mama ona.

nasin ni li awen e sona kepeken nasin nanpa pi kule tu taso. ilo nanpa li kepeken nasin nanpa ni, la nasin sitelen ni li pona tawa ilo. leko mute li pana e sona sama la ilo li ken ala lukin e leko wan la sona li awen. ni li kepeken nasin Wi Solomon pi weka pakala. jan li ken wile pakala e ona. jan li weka e kipisi wan pi sitelen leko li ken pana e sitelen pi pona lukin, la ilo li awen ken kama jo e sona tan leko.

nasin en kipisi

[o ante | o ante e toki ilo]
sitelen ni li toki e kipisi pi sitelen leko. nanpa 1 la nanpa nasin. nanpa 2 la nasin sona. nanpa 3 la sona wile en weka pakala. nanpa 4 la ijo ni o lon tenpo ale. nanpa 5 la ala o lon ni lon tenpo ale

nasin sitelen ni li kama ante lon tenpo. nasin ante li jo e nanpa ante. sitelen leko li toki e nanpa pi nasin ona.

kipisi wan pi sitelen leko li toki e ni: sona li nasin seme. nasin tu tu ni li lon: nanpa, en sitelen Lasina, en toki ilo, en sitelen Kan.[2]

leko pi mute nanpa wan li pana e sona suli pi sitelen leko. jan li wile e sona ni. sona ante li weka taso e pakala.

kulupu leko ni li lon: ona o sama lon sitelen leko ale. ni la, ilo li ken sona e ni: sitelen leko li lon seme.

selo sitelen li wile walo lon tenpo ale. ni la, ijo li lon poka sitelen la, ona li ike ala e sona.

sina wile lukin e lipu ilo la sina wile sona e nimi linluwi ona. sitelen leko li ken toki e nimi ni.

tomo moku li wile toki e ni: moku seme li lon. tenpo pini ale la, ona li sitelen e ni lon lipu. tenpo ni la, tomo moku li ken sitelen e ni lon lipu ilo, la sitelen leko li ken pana e lipu ilo ni.

ilo li wile kepeken linluwi la, ona li wile toki tawa ilo pi pana linluwi. ilo pana mute li pana tawa ilo ni taso: ilo li sona e toki len. sitelen leko li ken pana e toki len.

  1. ↑ jan Kala Masakilo (toki Nipon la: 原昌宏, Hara Masahiro) li toki e ni lon kipisi nanpa 34:09 lon sitelen tawa "I used to hate QR codes. But they're actually genius" lon lipu Welitasijun lon tenpo 2024/10/01.
  2. ↑ ni li tan QR Code features lon kulupu Tenso lon tenpo 2013/01/29. ona li awen lon ilo Internet Archive.
tan https://tok.wikipedia.org/w/index.php?title=sitelen_nanpa_pi_leko_walo_pimeja&oldid=32668