sama

ijo tu li sama la, nasin wan/mute pi ijo nanpa wan en nasin wan/mute pi ijo nanpa tu li lon kulupu wan.

o lukin e ni: ijo nanpa wan li sike loje. ijo nanpa tu li leko loje. ona tu li sama, tan ni: nasin pi ijo nanpa wan (kule) en nasin pi ijo nanpa tu (kule) li lon kulupu wan (loje). taso, ona tu li ante kin, tan ni: nasin pi ijo nanpa wan (sijelo) en nasin pi ijo nanpa tu (sijelo) li lon kulupu wan ala (ijo wan li sike, ijo ante li leko).

nasin wan pi ijo tu li lon kulupu wan la, jan li ken toki e ni: "ona tu li sama." taso, mute pi sama ijo li lon. ijo ni tu li jo e nasin mute la: nasin mute li lon kulupu wan la, jan li ken toki e ni: "ona tu li sama mute, li ante lili." taso, nasin wan taso li lon kulupu wan la, jan li ken toki e ni: "ona tu li sama lili, li ante mute." ni la, nasin mute pi ijo tu li lon kulupu wan la, ijo ni tu li sama mute. nasin lili pi ijo tu li lon kulupu wan la, ijo ni tu li sama lili.