nasin noka pi pali nanpa

nasin noka pi pali nanpa li lon nasin pi pali nanpa lon sona nanpa. ona li pona tawa ni: jan li ken pali e nanpa tan nanpa ante. pali tu tu li noka nanpa wan: pali pi wan nanpa, pali pi weka nanpa, pali pi mute nanpa, en pali pi kipisi nanpa. taso, pali ante li lon. nasin ni la, jan li toki kin e pali sewi e pali mute ante.

toki Inli en toki ante mute la, jan li kepeken nimi "arithmetic" tawa sona ni. nimi ni li tan nimi "ἀριθμός" (nanpa) tan toki Elina pi tenpo pini weka.

pali pi noka nanpa wan

pali pi wan nanpa

jan li jo e kili tu. kin la, ona li jo e kili tu wan. ale la, ona li jo e kili pi mute seme? kepeken nanpa la, jan li ken toki e ni:

o wan e tu e tu wan la, luka li lon.
$2+3=5$

ni li pali pi wan nanpa. ni li wan e nanpa tu anu nanpa mute li pana e nanpa wan suli tan ona ale.

pali pi weka nanpa

kili luka li lon. jan li weka e kili tu wan tan ni. ni la, kili pi mute seme li lon? kepeken nanpa la, jan li ken toki e ni:

tan luka la, o weka e tu wan la, tu li lon.
$5-3=2$

ni li pali pi weka nanpa.

pali pi mute nanpa

jan li jo e poki kili luka. poki ale li jo e kili tu tu li sama. ale la, ona li jo e kili pi mute seme? kepeken nanpa la, jan li ken toki e ni:

o mute e luka tawa tu tu la, mute li lon.
$5\times 4=20$

ni li pali pi mute nanpa. ni li wan e nanpa tu anu nanpa mute li pana e nanpa wan pi suli a tan ona ale.

ante la, pali mute li sama pali wan lon sike. mi wan e tu tu e tu tu e tu tu e tu tu e tu tu la, mi kama jo e mute. mute kulupu pi ijo tu tu li luka.

pali pi kipisi nanpa

jan li jo e poki kili tu tu. ona li jo e kili mute. ona li wile pana e kili pi mute sama tawa poki ale la, ona o pana e kili pi mute seme tawa poki wan? kepeken nanpa la, mi ken toki e ni:

o kipisi e mute tawa tu tu la, luka li lon.
$20\div 4=5$

ni li pali pi kipisi nanpa. ona li ante tawa pali mute sama ni: pali wan en pali weka li ante.

mi kipisi e nanpa tawa ala la ni li ken ala. mi kipisi e ala tawa nanpa ali la mi kama jo e ala. mi kipisi e ala tawa ala la ni kin li ken ala.

pali kipisi li sama pali weka lon sike. mi kipisi e mute tawa tu tu la mi ni: mi open lon mute. mi weka e tu tu lon sike. pini la mi kama jo e nanpa ala. pali kipisi li sama ni: mute seme la mi weka e tu tu?

lon kulupu pi nanpa lon la pali kipisi li kama e nanpa tu: ona li kama e nanpa pi mute kulupu e nanpa awen. mi kipisi e mute wan tawa tu tu la mi kama jo e kulupu luka e awen wan. mi kipisi e nanpa #1 tawa nanpa #2 la ni li lon: nanpa #2 la nanpa awen li lili. toki open la, jan li jo e kili mute tu wan la, mi ken toki e ni kepeken nanpa:

o kipisi e mute tu wan tawa tu tu la, luka li lon. taso, tu wan li awen.
$23\div 4=5\ {\text{R}}3$

lon kulupu pi nanpa kipisi la pali kipisi li kama e nanpa wan. kepeken toki sama la:

o kipisi e mute tu wan tawa tu tu la, mute tu wan pi kipisi tu tu li lon.
$23\div 4={\frac {23}{4}}$

ante la: luka en tu wan pi kipisi tu tu li lon.
$23\div 4=5{\frac {3}{4}}$

ante la: luka ala mute mute mute luka luka luka li lon. (nimi pi toki pona li tan nasin ni)
$23\div 4=5.75$

nanpa lon en nanpa weka

jan li sona e nanpa lon e nanpa weka la, jan li ken kepeken e nasin ante. nasin ni en nasin noka li ante mute ala. o awen sona e ni:

$5$ li nanpa lon li lon luka anu luka taso.

$-5$ li nanpa weka li weka luka.

"li lon" anu "li weka"

jan li pali nanpa la, nanpa kama (=) li nanpa lon anu nanpa weka.

nanpa kama li nanpa lon la, jan li ken kepeken e toki ni:

$...=+x$ (pali nanpa) la, (nanpa kama) li lon.

nanpa kama li nanpa weka la, jan li ken kepeken e toki ni:

$...=-x$ (pali nanpa) la, (nanpa kama) li weka.

kin la, sina wile ala kepeken e toki "li lon" anu toki "li weka" la, sina ken kepeken e toki ni:

$...=+x$ (pali nanpa) la, lon (nanpa kama) li kama.
$...=-x$ (pali nanpa) la, weka (nanpa kama) li kama.

o toki ala e pali pi weka nanpa

jan li sona e nanpa lon e nanpa weka la, ona li ken pali pi weka nanpa li toki ala e pali pi weka nanpa kepeken nasin ni: ona li ken toki e pali pi wan nanpa taso, sama ni:

$a-b=n$
o wan e a e weka b la, n li kama.

pali mute lon wan:

$-a+b+c-d=n$
o wan e weka a e b e c e weka d la, n li kama.
anu:
o wan e weka a e lon b e lon c e weka d la, lon n li kama.

nanpa lon la, jan li ken kepeken e nimi "lon" anu ala.