pali:tomo toki/tenpo pini/2

nimi soweli

pilin kulupu la nimi pi lipu soweli Felis Catus o seme. nimi ona o awen soweli Felis Catus anu kama soweli Peli Katu anu seme

lukin la nasin pi nimi soweli li sama ala lon lipu ale. lipu soweli Usite la nasin li ni: o toki pona e nimi pi toki Lasina. lipu soweli suwi lape pi kasi suli la nasin li ni: o pana e nimi suli tawa soweli, o pana e nimi soweli pi toki Inli (tan seme a). lipu soweli Canis Familiaris la nasin li ni: o pana e nimi pi toki Lasina taso.

ni la, mi wile sona e ni: nasin seme li pona tawa lipu Wikipesija. pilin mi la nasin pi lipu "soweli Usite" li ken pona. taso mi wile sona e pilin kulupu. ­­ soweli Tesa (toki · ante) 2024-04-19T03:03:09 (UTC)

ike tawa toki pona la soweli li mute. tan ni la nimi kin o mute. taso la toki pona la nimi mute ni li lon ala. pilin mi la lipu ale o kepeken nasin ni: nimi pi toki Lasina en nimi pi toki pona o lon. nasin ni li pona mute tawa mi: a, soweli pi kule ma pi lape lon tenpo suli. nasin ni li ike tawa mi: a, soweli Usite. jan li toki e soweli Usite la sona ala li lon nimi. nimi Usite li sama nimi sin a!

sina sona ala sona e toki mi a? Kanso (toki) 2024-04-24T02:06:45 (UTC)

pilin mi pi tenpo lon en pilin mi pi tenpo pini li ante mute a a.

lon la pilin mi li ni: lipu pi soweli wan taso li lon la nasin pona li ken ala. nasin ale li ike. nimi li suli mute sama "soweli pi kule ma pi lape lon tenpo suli" la ni li ike. nimi pi toki Lasina li ike kin. mi toki e soweli ni lon toki pona la, mi toki ala e nimi suli anu nimi pi toki Lasina. mi toki e nimi lili sama "soweli wawa" anu "soweli pimeja" anu ijo ante.

nasin pona li ken lon. soweli li mute la ni li ken ike ala tawa toki pona. taso nasin pona la lipu pi soweli wan taso o lon ala. lipu o toki e soweli mute sama.

nasin pona la, lipu pi soweli "Usite" o weka. lipu soweli wawa li ken lon li ken toki e soweli wawa ale. lipu soweli suli li ken lon li ken toki e soweli suli ale. lipu soweli pi lape suli li ken lon li ken toki e soweli ale ni: ona li lape lon tenpo suli. lipu ni ale li ken toki e soweli "Usite" e soweli ante

lipu pi soweli "Felis Catus" o weka. lipu soweli tomo en lipu soweli alasa en lipu ante li ken toki e soweli ni e soweli ante. lipu ale pi soweli wan taso o weka. lipu pi soweli mute o toki e soweli.

taso ike la mi pilin e ni: jan li wile ala pali e lipu pona ni. ona li wile pali e lipu pi soweli wan taso tan ni: lipu Wikipesija pi toki ante la lipu li toki e soweli wan taso.

ni la, lipu pi soweli wan taso li awen lon la nasin ale li pona sama tawa mi. soweli Tesa (toki · ante) 2024-04-24T03:26:19 (UTC)

toki sina li sona pona. lipu pi soweli wawa li toki e soweli wawa ale. nasin ni li pona tawa mi. ken la mi mute o open ante e lipu, o open tawa e sona tawa lipu sin mute pi nasin ni. pilin sina la mi mute li open ni la ni li pona ala pona? Kanso (toki) 2024-04-24T03:31:44 (UTC)

ni li pona tawa mi. soweli Tesa (toki · ante) 2024-04-26T01:51:43 (UTC)

mi open ni. lipu pi waso pimeja walo li kama lon. sina ken toki e pilin tawa nasin sitelen pi lipu ni a. 🙏 Kanso (toki) 2024-04-26T21:25:23 (UTC)

mi la, nasin tu li ken lon. nasin pi toki Lasina ala li pona. taso, lipu pi nimi pi toki Lasina li ken pona tan ni: jan li toki pona, li wile sona e kon pi nimi Felis Catus, la ona li ken sona e ona kepeken toki pona. lipu pi nimi Lasina li ken pana e sona pi sama ni: "toki sona la, nimi Felis Catus li nimi soweli. soweli ni li soweli tomo tawa jan mute. sijelo pi soweli ni li sama ni: [...]. soweli ni li pali ala e sike mama, soweli ni li [...]. sina wile sona la, o lukin e lipu ni: [...]". ni la, jan li ken sona e nimi nasa kepeken toki pona taso. lipu pi soweli tomo o jo ala e linja pi tawa lipu Felis Catus. Jan Lolen (toki) 2024-08-30T00:12:26 (UTC)

mi wile e pona tawa ni

mi ken ala alasa e ijo pi pali lipu Jan wikipesija (toki) 2024-09-10T00:10:22 (UTC)

sona nanpa

mi weli e ni: sona nanpa li suli. mi jo e sin sona. mi kepeken toki Inli tan ni: sina mute sona e mi.

2 + 2: tu li pana tawa tu (add two to two)

2 - 2: tu li weka tan tu (take two out of two)

5 * 3: luka li pana tawa luka lon nanpa tu wan (add five to five three times); luka pi tu wan (three fives)

2 / 2: tu kipisi e tu

2³ (2 * 2 * 2): tu li pana tawa tu lon nanpa tu wan

√2 (2^0.5): tu li pana tawa tu lon nanpa wan li kipisi tu

ni li pona ala pona tawa sina mute? mi sona e ni: toki ni li ike. sina mute ken ala ken pana e pona tawa mi?

_jan Sa0la^toki 2024-10-27T18:15:11 (UTC)

ni li pona tawa mi:

2 + 2 = 4: tu en tu li tu tu

2 - 2 = 0: tu weka tu li ala

2 * 2 = 4: tu suli tu li tu tu

2 / 2 = 1: tu pakala tu li wan (nimi pu ala la: tu kipisi tu li wan)

2² = 4: tu wawa tu li tu tu

√2 = 1.414...: tu wawa pakala tu li 1.414 sama (1.414 li wan lon, tu tu a wan a tu tu a)

567 890: luka a luka wan a luka tu a luka tu wan a luka tu tu a ala a.

10²¹: luka luka tawa tu a wan. Kijosi (toki) 2024-10-27T22:32:22 (UTC)

ni li nasa tawa mi. mi wile ala e ni: sitelen pi pali nanpa en toki nanpa li sama ale. mi toki nanpa la, mi toki a kepeken nasin pi toki pona. nasin mute li ken. mi toki mute a e nimi 'la'.

2+2=4 tu la tu sin la tu tu li lon. tu la o pana e tu la tu tu li kama

2-2=0 tu la o weka e tu la ala li kama.

2*2=4 tu la ni tu la tu tu li kama. tu la o mute *tu* e ni la tu tu.

2/2=1 tu la o kipisi tu la wan li lon.

2^2=4 tu la o mute sama e ona la tu tu li kama.

√2 tu la...ken la o kipisi sama e ona. o kipisi ni: mute kipisi en nanpa kama li sama. ni li 1.414...

56,78,90. nasin nanpa pona la mute mute luka luka luka wan ale mute mute mute luka luka luka tu wan ale mute mute mute mute luka luka... jan Tepo (toki) 2024-11-14T22:09:32 (UTC)

tawa mi la, ona li pakala ala e nasin pi toki pona. kin la, ona li awen e tenpo. jan pi sona nanpa pi toki pona li kepeken e nasin sina la, ken la, toki pi suli ni li ken weka e tenpo pi suli nasa. nasin nanpa pona kin li kama tan ni: jan mute li wile e awen e tenpo. kin la, toki pona li wile e ni: pona e ijo ale, lili e ijo ale. Kijosi (toki) 2024-11-14T23:00:23 (UTC)

pona li ni ala: jan li toki kepeken mute nimi lili. pona li ni: jan li ken sona e toki kepeken nasin lili. suli la nasin sina li tan ala toki pona... ona li sama nasin pi toki ante la ona li nasa ala tawa sina, taso tawa toki pona la ona li nasa. jan Tepo (toki) 2024-11-15T19:48:05 (UTC)

tawa mi la, jan mute li sona e kon pi toki ni: "tu en tu li tu tu" en toki mi ante. Kijosi (toki) 2024-11-16T13:04:23 (UTC)

ni pi nimi en li nasa mute ala, nimi 'en' li ken sama ni. nimi 'weka' li ken ala lon insa pi nimi ijo tu sama ni jan Tepo (toki) 2024-11-16T20:16:42 (UTC)

jan ken pali e kon sin pi nimi "weka". sona nanpa la, nimi "weka" ken nimi pi ma open ("kepeken", "lon", "insa", "tawa" sama). Kijosi (toki) 2024-11-16T23:21:46 (UTC)

ni li ante suli nasa lon nasin toki. ni o ante tan wile pi suli mute taso. sona nanpa li ijo wan taso, li wile pi suli ala; mi ken toki pona e weka nanpa kepeken nasin sin ni ala. jan Tepo (toki) 2024-11-24T21:51:18 (UTC)

kin la, jan li ken pali e kon nimi sin pi nimi pi toki pona. kon nanpa wan pi nimi "luka" li ilo sijelo jan. taso, kon sin pi nimi ni li nanpa. Kijosi (toki) 2024-11-16T16:23:53 (UTC)

tenpo ni la, sina ken sona ala e kon toki ni. taso, ken la, tenpo kama la, nimi ni li alasa e kon sin pi kepeken lon sona nanpa. tenpo kama ni la, jan ale pi kepeken sona nanpa li sona e toki ni. Kijosi (toki) 2024-11-16T16:36:17 (UTC)

tawa mi la, lukin e sitelen 89 la, mute mute mute mute luka tu tu li pona lili, luka tu wan a luka tu tu li pona mute tawa lawa, tawa sona. Kijosi (toki) 2024-11-14T23:12:04 (UTC)

pakala li ni: nimi 'a' li toki ala e 'luka luka' jan Tepo (toki) 2024-11-15T19:49:00 (UTC)

toki pona li toki pi sona pi ijo poka. ona li toki pi sona lon, sona tenpo, sona ma en sona ante. jan li ken sona e ni: "luka tu wan" li toki e ijo luka tu wan. ijo ni li ken luka luka. kin la, nimi "a" li ante lili taso e kon pi nimi ni. nimi "a" li toki e ni taso: o lukin e nimi ni. taso, ken la, sina toki e lon: nimi "a" li nimi ike tawa ni. taso, jan ken kepeken e nimi lili ante. Kijosi (toki) 2024-11-16T17:03:47 (UTC)

n! ona li tu e nimi nanpa tu, anu seme? ni li kama ken pona lili tawa mi. taso, ni li toki e sitelen nanpa, e nanpa a ala. a, mute la mi kepeken nimi 'en' lon ni. "nanpa mi pi ilo toki li ni: luka en tu wan en wan en...."

---

"toki pi sona lon, sona tenpo, sona ma, en sona ante"

nimi 'en' li nasin pona ala lon ni. #1) ona li tu e ijo la ona li wile lon insa pi ijo ale, sitelen ',' taso li ken ala. ("sona lon, en sona tenpo, en sona ma...") #2) ona li ken ala lon insa poki pi nimi 'pi' (la ni la mi toki la mi kepeken nimi 'kepeken', sama ni "ona li toki kepeken sona lon, kepeken sona tenpo...") jan Tepo (toki) 2024-11-16T20:24:09 (UTC)

mi pakala. mi wile sitelen e ni: "toki pi sona lon pi sona tenpo pi sona ma pi sona ante". Kijosi (toki) 2024-11-16T22:55:17 (UTC)

taso, ken la, nimi "kepeken" li pona mute lon ni. Kijosi (toki) 2024-11-16T22:59:32 (UTC)

ni li pona mute a. taso la mi la ante ni li ken pona e nasin ni:

nanpa wan. o kepeken ala e nasin ni tawa kama: ".... (nanpa) li kama". toki ni li suli. o kepeken e nasin ni: ".... ni li (nanpa)"

ni li sama ni:

6+3=9 → luka wan la o pana e tu wan la ni li luka tu tu.

nanpa tu. mi wile e ni: ken la nasin pi pali nanpa ale li sama. sina kepeken e nasin ni tawa pali nanpa "*": "(nanpa) la ni (mute) la ....". ni li ike tan ni: ni li ante.

sina kepeken kin e nasin ni tawa pali nanpa ni: "(nanpa) la o mute (mute) e ni la ....". ni li ike tan ni: "mute" li jo kin e kon pi nanpa luka luka luka luka. ken la ni li pona tan ni: nimi "mute" lon toki ni li nimi pali. taso, ken la jan li pilin nasa.

mi la o kepeken e nasin ni: "(mute) la o mute ni e (nanpa) la ni li (kama)". ni li sama ni:

6*3=18 → luka wan la o mute ni e tu wan la ni li luka luka luka tu tu.

lon la ni li pona tan ni: nasin pi ma ale la "6*3" li kulupu luka wan pi nanpa tu wan. ni li ni ala: kulupu tu wan pi nanpa luka wan. Sanfilzands (toki) 2025-11-02T09:52:54 (UTC)

toki pona :) ni ale li ken jan Tepo (toki) 2025-11-02T22:56:17 (UTC)

ni li nasa lili tan mi. sina kepeken nimi mute la nasin li ken kama pona.

2+2 = ijo tu en ijo tu li lon

3-2 = ijo tu li weka tan ijo tu wan

2*5 = kulupu luka pi ijo tu li lon

10/2 = ijo luka luka li tawa poki tu

tu wan ni sewi la nasin ante li lon

a:b=x:y = suli A li sama suli B la suli X li sama suli Y

ni li sama ni:

x=a/b*y

ni la, sina ken toki e ni:

x = 3/10

x:1 = 3:10

suli TW li sama suli LL la suli X li sama suli W

x = 5*6

x:6 = 5:1

suli L li sama suli W la suli X li sama suli LW

mi pali e toki ilo pi toki pona (ona li lon lipu Kitapu) la mi kepeken nasin ni

2^3 la mi sona ala

mi wile e ni: toki nanpa li sama toki ale. nasin sina la, jan li sona ala e nasin ni la jan li sona ala e wile toki sina. mi wile e nasin pi sama ni: jan ale li kute e ona la ona li sona e wile toki nanpa mi. mi la, nasin mi li pona ni.

ike pi nasin sina li ike nanpa wan pi ike Lexicalization (mi sona ala e nimi pona ona pi toki pona)

musi la, mi wile toki e ni la ilo Captcha li toki nanpa ni tawa mi: kili wan en kili wan sin li kili pi mute seme? jan Lolen (toki) 2024-11-16T00:10:12 (UTC)

• tu ni sewi. tu wan ala. mi pakala. taso sina ken sona e wile toki mi jan Lolen (toki) 2024-11-16T00:11:52 (UTC)

a a ni li sama nasin mi. nimi pi nasin sina li ante tawa nimi pi nasin mi, taso awen la nasin li sama: "toki nanpa li sama toki ale." jan Tepo (toki) 2024-11-16T03:11:40 (UTC)

mi pona ala e ni: mi mute li alasa e pini pi sona nanpa? _jan Sa0la^toki 2025-02-07T18:39:40 (UTC)

mi pilin e ni: kulupu pi toki pona li wile e ante. mi mute li ken ante e toki pona. ken la jan Sonja li pana e pona tawa mi mute? mi mute li pali ala la toki pona li pini e tawa lon tenpo kama _jan Sa0la^toki 2025-02-07T18:43:31 (UTC)

pilin mi la toki pona (en toki ale) li kama wawa lon nasin ni ala: jan pali li lon, li pali e nasin toki, li pana e ona, la pali li pini. nasin li ni: jan ale li pali e nasin toki lon tenpo ale, lon insa lawa ona, kepeken toki insa, kepeken toki kulupu. ni li wile ala e jan Sonja. jan li awen kepeken toki pona la, tenpo kama la jan mute li sona e nasin toki nanpa pona. ken la jan wan ni li lipu e ona. mi en sina li pali ala lon tenpo ni la, ni li awen kama lon tenpo kama. jan Tepo (toki) 2025-02-07T19:47:15 (UTC)

sina li toki e pona. taso mi pilin e ni: toki pona li lon tenpo kama, pali sin li lon ala lon toki pona lon tenpo kama. jan mute pi tomo toki ni li toki e nasin pona tawa toki pona. jan mute li jo e pilin mute, taso jan ali li pilin e ni: pilin pi jan ante li ike, pilin mi li pona. sona nanpa li lon toki pona la toki pona li suli mute _jan Sa0la^toki 2025-02-08T14:37:06 (UTC)

ijo sin pi lipu Wikipedia

kulupu Language Committee li toki e ni: o ante e toki mute la o pali mute la lipu Wikipesija pi toki pona li ken pali lon lipu Wikipedia. https://meta.wikimedia.org/wiki/Requests_for_new_languages/Wikipedia_Toki_Pona_2 Ca (toki) 2024-11-24T23:26:23 (UTC)

mi sona! ilo Siko la jan li toki mute e pali ni. jan Tepo (toki) 2024-11-24T23:29:27 (UTC)

198.16.99.176

jan ni li jaki. jan jaki mute li wile e pana esun lon lipu Wikipesija. awen ni li ken ala ken? awen la lipu Wikipesija li kepeken ilo "edit filter". Ca (toki) 2024-11-25T05:39:06 (UTC)

mi weka e ilo ni. sina lukin ala lukin e ilo jaki ante sama? o pana e ona tawa mi. mi ken lukin weka e nasin ona kepeken ilo. jan Tepo (toki) 2024-11-25T05:41:11 (UTC)

lipu suli mute

mi pali e lipu suli mute. ni li lipu suli 10000. sina ante e toki tawa toki pona lon lipu ni la, mi pilin e pona _jan Sa0la^toki 2025-02-26T17:40:51 (UTC)

mi pali e ilo kepeken toki ilo. mi pali e ni lon tenpo kama: tawa e lipu tan lipu suli tawa lipu ni! _jan Sa0la^toki 2025-02-26T18:45:15 (UTC)

mi pali e ali. taso lipu li sin ala. mi pilin e ni: ona li sin lon tenpo kama _jan Sa0la^toki 2025-02-26T19:07:07 (UTC)

tenpo ni la mi pali e lipu suli kin.ona li pana ala tan ni:ona li pini ala.sina mute wile la,sina ken ante.taso o pakala ala. So Sinjo (toki) 2025-03-09T07:33:41 (UTC)

tenpo kama la, mi lukin e ni _jan Sa0la^toki 2025-03-09T10:06:30 (UTC)

sina pona!ken la,pakala lili li lon.sina ken pona e lipu ni!mi wile e ni:lipu Wikipesija li ken jo e lipu mute pi pona en suli lon tenpo kama. So Sinjo (toki) 2025-03-09T12:12:35 (UTC)