o tawa ijo lipu

nasin nanpa sitelen Jusisa

tan lipu lipu Wikipesija
(tan nimi "nasin UCSUR")

nasin Jusisa (toki Inli la: Under-ConScript Unicode Registry, UCSUR /ˈjusisər/)[1] li nasin namako pi nasin Juniko. ona li nasin sin pi nasin Sisa (toki Inli la: ConScript Unicode Registry, CSUR).

nasin Juniko la, sitelen wan li jo e nanpa wan. taso, nanpa ni li lon: kulupu Juniko li pana ala e sitelen tawa ona, tan ni: jan ante li ken pana e sitelen ante tawa ona. nanpa ni li kulupu nanpa PUA (toki Inli la: Private Use Area, "jan li kepeken ni la jan lawa li lawa ala e nasin ona"). jan Son Kowan (John Cowan) en jan Mako Eweson (Michael Everson) li pana e sitelen mute tawa kulupu nanpa PUA, li nasin e ona. nasin ona li nasin Sisa.[2]

nasin Sisa la, nasin sitelen sin pali mute li lon.

jan tu ni li pini nasin e sitelen lon tenpo sike nanpa 2008 tan ni: pali suli ante li lon la tenpo li lili.[3] jan Wepeka Kapijela Petenko (toki Inli la: Rebecca Gabriella Bettencourt, toki pona la: jan Lepeka) li suli e nasin Sisa li pali e nasin Jusisa.

nasin Jusisa li kama jo e nasin sitelen ante mute. wan la, sitelen pona. kepeken nasin Jusisa la, jan li ken kepeken sitelen pona lon ilo nanpa.

nasin sitelen ilo lili li ken pana e lukin pi nasin Jusisa. nasin Fairfax en nasin Nisiki Teki (toki Nipon la: にしき的) li tu ona.

nasin Jusisa li kepeken nanpa ni: ona li open lon nanpa E000 li pini lon nanpa F1C3F.[2][4][5]

sitelen pona li lon nasin Jusisa. ona li open lon nanpa F1900 li pini lon nanpa F19FF. kipisi lili pi sitelen pona (toki Inli la: "Sitelen Pona Radicals") kin li lon, li open lon nanpa F1C80 li pini lon nanpa F1C9F.

  1. ↑ ni li tan lipu ilo pi kulupu KreativeKorp lon tenpo 8 November 2023.
  2. 1 2 jan Son Kowan en jan Mako Eweson (toki Inli la: John Cowan, Michael Everson) li toki e ni lon lipu "ConScript Unicode Registry" lon lipu Evertype lon tenpo 2023-04-27.
  3. ↑ jan Son Kowan (toki Inli la: John Cowan) li toki e ni lon lipu "Re: CSUR help" lon lipu KreativeKorp lon tenpo 2008-02-04.
  4. ↑ jan Mako Eweson (toki Inli la: Michael Everson) li toki e ni lon lipu "Roadmap to the ConScript Unicode Registry" lon lipu Evertype lon tenpo 2008-03-21.
  5. ↑ jan Wepeka Petenko (toki Inli la: Rebecca Bettencourt) li toki e ni lon lipu "Under-ConScript Unicode Registry" lon lipu KreativeKorp.
tan https://tok.wikipedia.org/w/index.php?title=nasin_nanpa_sitelen_Jusisa&oldid=32576