musi pi sike palisa tan ma Mewika

musi pi sike palisa tan ma Mewika (toki Inli la: American Football) li musi sijelo li musi sike. tenpo mute la jan li musi e ona lon ma Mewika. musi sijelo pi kulupu jan pi ma Mewika la musi sijelo pi sike palisa li suli nanpa wan. musi ni la kulupu tu pi jan 11 (LLW ^[nnp]) li lon. kulupu tu li musi lon ma kasi supa leko. ma kule li lon selo ante tu. palisa poki li lon monsi pi ma kule. kulupu jan li jo e sike la ona li wile tawa ma kule pi kulupu ante e sike. kulupu tawa li ken waso e sike li ken tawa e sike lon ma. kulupu jan li jo ala e sike la ona li wile pini e kulupu tawa li wile lanpan e sike. jan pi kulupu tawa li jo e sike la jan pi kulupu pini li ken anpa e sijelo ona. tenpo 4 (TT) la kulupu tawa li alasa tawa ma kule e sike. ona li tawa mute 10 (LL) pi palisa walo la ni li lon: tenpo 4 (TT) sin la ona li alasa tawa. kulupu tawa li tawa ala mute 10 (LL) pi palisa walo lon tenpo 4 (TT) la kulupu pini li kama jo e sike li kama kulupu tawa. kulupu tawa li tawa ma kule e sike la nanpa ona li suli. ona li waso e sike tawa palisa poki la nanpa ona li suli kin. tenpo pi pini musi la kulupu pi nanpa suli li anpa e kulupu pi nanpa lili.

nimi

toki Inli pi ma Mewika la, nimi musi pi sike palisa li ni: "musi pi sike noka". taso, toki Inli pi ma Juke la kon pi nimi "musi pi sike noka" li sama nimi musi pi toki pona. jan pi ma Juke, pi ma ante la nimi musi pi sike palisa li nimi "musi pi sike noka pi ma Mewika."

ma Oselija en ma Kanata la musi ante pi sike palisa li lon. ona li musi pi sike palisa pi ma Oselija li musi pi sike palisa pi ma Kanata.

kulupu kulupu en utala musi

musi pi sike palisa pi ma Mewika la kulupu 2 pi kulupu jan li suli. jan li musi tan mani la jan li kulupu ni: kulupu kulupu musi pi sike palisa pi ma Mewika (toki Inli: National Football League anu NFL). jan li musi li kama sona kin lon kulupu pi sona suli la jan li kulupu ni: kulupu ni pi ma Mewika la jan pi musi sijelo li kama sona lon kulupu pi sona suli (toki Inli: Natinal Collegiate Athletic Association anu NCAA).

kulupu kulupu musi pi sike palisa pi ma Mewika

kulupu ni la kulupu pi jan musi li 32 (MLLTT). tenpo 17 (LLLT) la kulupu jan ale li musi. tenpo 17 (LLLT) li pini la tenpo utala li open. tenpo utala la kulupu jan 14 (LLTT) li musi. tenpo utala la ni li lon: kulupu jan li anpa e kulupu ante la kulupu anpa li pini musi e tenpo utala. kulupu jan 2 taso li lon tenpo utala la ona li musi e utala Supa Po (toki Inli: Super Bowl).

kulupu jan

kulupu kulupu musi pi sike palisa pi ma Mewika li tu. tu nanpa wan li kulupu musi pi sike palisa pi ma Mewika (toki Inli: American Football Conference anu AFC). kulupu musi ni la kulupu lili 4 (TT) li lon.

kulupu lili pi open suno la kulupu ni li lon:

ma tomo Pupalo la kulupu Pi (toki Inli: Buffalo Bills) li lon.
ma tomo Majami la kulupu Topan (toki Inli: Miami Dolphins) li lon.
ma Masasusi la kulupu Pasija (toki Inli: New England Patriots) li lon.
ma tomo Nujo la kulupu Se (toki Inli: New York Jets) li lon.

kulupu lili lete la kulupu ni li lon:

ma tomo Pomo la kulupu Lapen (toki Inli: Baltimore Ravens) li lon.
ma tomo Sinsinasi la kulupu Penka (toki Inli: Cincinnati Bengals) li lon.
ma tomo Kalilen la kulupu Pan (toki Inli: Cleveland Browns) li lon.
ma tomo Pipe la kulupu Sila (toki Inli: Pittsburg Steelers) li lon.

kulupu lili seli la kulupu ni li lon:

ma tomo Juson la kulupu Tesa (toki Inli: Huston Texans) li lon.
ma tomo Insi la kulupu Ko (toki Inli: Indianapolis Colts) li lon.
ma tomo Sasonwi la kulupu Sawa (toki Inli: Jacksonville Jaguars) li lon.
ma Tenesi la kulupu Tatan (toki Inli: Tennessee Titans) li lon.

kulupu lili pi pini suno la kulupu ni li lon:

ma tomo Tenwa la kulupu Panko (toki Inli: Dever Broncos) li lon.
ma tomo Kansa la kulupu Si (toki Inli: Kansas City Chiefs) li lon.
ma tomo Laweka la kulupu Lata (toki Inli: Los Vegas Raiders) li lon.
ma tomo Ele la kulupu Sasa (toki Inli: Los Angeles Chargers) li lon.

tu nanpa tu li kulupu musi pi sike palisa pi ma lawa (toki Inli: National Football Conference anu NFC). kulupu musi ni kin la kulupu lili 4 li lon.

kulupu lili pi open suno la kulupu ni li lon:

ma tomo Tala la kulupu Kapo (toki Inli: Dallas Cowboys) li lon.
ma tomo Nujo la kulupu Sajan (toki Inli: New York Giants) li lon.
ma tomo Pilatepija la kulupu Ika (toki Inli: Philadelphia Eagles) li lon.
ma tomo Sisi la kulupu Komanta (toki Inli: Washington Commanders) li lon.

kulupu lili lete la kulupu ni li lon:

ma tomo Sikako la kulupu Pe (toki Inli: Chicago Bears) li lon.
ma tomo Tetowi la kulupu Lajon (toki Inli: Detroit Lions) li lon.
ma tomo Kinpe la kulupu Peka (toki Inli: Greenbay Packers) li lon.
ma Minesota la kulupu Wakin (toki Inli: Minnesota Vikings) li lon.

kulupu lili seli la kulupu ni li lon:

ma tomo Alanta la kulupu Pakon (toki Inli: Atlanta Falcons) li lon.
ma Nokewalana la kulupu Pansa (toki Inli: Carolina Panthers) li lon.
ma tomo Nolan la kulupu San (toki Inli: New Orleans Saints) li lon.
ma tomo Tanpa la kulupu Pukani (toki Inli: Tampa Bay Buccaneers) li lon.

kulupu lili pi pini suno la kulupu ni li lon:

ma Ewisona la kulupu Kasina (toki Inli: Arizona Cardinals) li lon.
ma tomo Ele la kulupu Lan (toki Inli: Los Angeles Rams) li lon.
ma tomo San Pansiko la kulupu Posinana (toki Inli: San Fransisco 49s) li lon.
ma tomo Sijate la kulupu Siwa (toki Inli: Seatle Seahawks) li lon.