musi Mikaliwi

tenpo musi Mikaliwi (toki Nawa la: Mihcailhuitl /mik.kaˈil.wit͡ɬ/) anu tenpo musi pi jan moli (toki Epanja la: Día de Muertos [ˈd̪ia ð̞e ˈmweɾt̪os]) li tenpo musi suli lon ma Mesiko. kin, ona li lon ma Amelika insa, lon ma Sulamelika. tenpo ni li lon tenpo suno nanpa wan pi tenpo mun nanpa luka luka wan. tenpo musi ni li ante tawa tenpo Alowin, taso, ona li jo e ijo sama. tenpo musi pi ma Mesomelika en tenpo musi pi ma Elopa li wan la, tenpo musi Mikaliwi li kama lon. kulupu mama li pali li namako e supa sewi tawa kon pi jan moli. kin, jan li tawa lupa pi jan moli, li pana e ijo pona lon ni.

musi ijo ante lon tenpo Mikaliwi li moku e "pan pi jan moli" (toki Epanja la: Pan de Muerto) e kiwen lawa suwi (toki Epanja la: Calaveritas de Ázucar), li toki e toki musi lon jan lon (toki Epanja la: Calaveritas Literarias). taso, toki musi ni la, jan ona li moli.

supa sewi

kulupu mama mute li pali e supa sewi tawa kon pi jan moli. ona li pali e supa kepeken poki pi kiwen kasi. ona li namako e supa ni kepeken kasi kule Senpowasosi (toki Nawa la: Cempohualxochitl), kepeken kasi kule ante, kepeken lipu kule, kepeken palisa seli, kepeken namako sewi lili. ni la, jan li pana e sitelen pi jan moli lon supa. jan li pana e ijo pona tawa jan moli ni. tenpo mute la, jan li pana e kili, e pan suwi, e moku, e telo nasa, e ijo sewi, e ijo musi ante lon supa sewi. ijo ale ni li pona tawa jan moli.

supa sewi li jo e sijelo ante

meli moli Katalina

jan Katalina lon poka pi supa sewi pi musi Mikaliwi.

meli moli Katalina (toki Epanja la: La Catrina) li jan moli pi lon ala. sijelo pi jan Katalina li kiwen pi sijelo insa. ona li len kepeken len namako kule. jan ni pi lon ala li suli lon tenpo Mikaliwi.