musi Tokusu Monokatali

musi Tokusu Monokatali 洞窟物語 Dōkutsu Monogatari Cave Story

musi Tokusu Monokatali li musi pi ilo sona.

ona la jan li ken lon ma suli powe li ken alasa e soweli ike.

musi la, lipu toki

ma musi

musi Tokusu Monokatali li lon lupa, lon insa ma sewi. ma ni la, soweli Mimika mute li lon. soweli Mimika li sama soweli suwi pi kute suli, li sama jan. kasi kule loje li lon ma sewi. soweli Mimika li wile utala ala. taso, ona li moku e kasi loje la, ona li kama nasa monsuta li wile utala. ma ni li jo e ijo ni pi wawa nasa: len lawa Akuma. jan ilo utala mute li kama tan ma anpa, li alasa lanpan e len lawa Akuma. jan ilo li moli e soweli Mimika mute, taso soweli li utala tan utala kepeken kasi kule loje. tenpo pini poka pi musi open la, kulupu pi alasa sona li kama ma sewi. kulupu la, jan sona Pusuta, en jan sama kulupu Sakamoto, en jan pali ante li lon. ta so, jan misikeke ona Fujukiko Date li alasa e len lawa Akuma. tan lawa wawa ona ni la, jan pali li open alasa e kasi kule loje.

toki musi

jan musi li pini e lape lon lupa pimeja, li weka sona e ale. nasin kama ni la, ona li sona ala e tan. ona li tawa ma tomo pi soweli kulupu Mimika. ma ni la, jan Tokuta li pakala e kulupu pi soweli Mimika. jan Tokuta li jo e jan pali tu ni: jan Misali en leko Paluloku. jan pali tu li alasa e soweli Su Sakamoto. soweli Su li jan lon tenpo pini, taso ona li kama soweli Mimika tan wawa nasa. tan sona pakala la, jan Misali en leko Paluloku li lanpan jan e soweli Toloko.

jan musi li lukin e jan Su, lon tomo pi sike akesi sin. jan Su li alasa e sike akesi sewi sin. ona li alasa open e sike, li alasa tawa weka tan ma sewi kepeken akesi sewi. jan Su li alasa e mije sama ona Kasuma. taso, soweli lawa Kinku li poki awen e ona. soweli Kinku li pilin e ni: tan jan Su la, jan pali pi jan Tokuta li lanpan jan e soweli Toloko. ni la, jan Su li toki e wile ni tawa jan musi: o tawa ma kasi Kusamula li kama e jan Kasuma.

jan musi li tawa ma kasi, li weka e jan Kasuma tan tomo awen. pini la, ona li lukin e jan sona Pusuta. jan Pusuta li toki e ni: jan Tokuta li alasa e kasi kule loje. kepeken kasi loje la, jan Tokuta li wile lawa wawa e soweli Mimika, li utala e ma anpa, li lawa wawa e ma ale. jan Pusuta li toki e wile ni tawa jan musi: o tawa ma Sunaku, o pakala ale e kasi kule loje ale.

lon ma Sunaku la, jan musi li lukin e jan ilo Kali Pulesu e jan majuna Jenka pi wawa nasa. jan ilo Kali li weka sona e ale kin. jan Jenka li mama meli pi jan Misali, li jan awen pi kasi kule loje. jan Jenka li toki e sona pi jan ilo mute. jan musi li jan wan pi kulupu utala ilo tan ma anpa, li moli e soweli Mimika mute. pini toki la, leko Paluloku li lanpan e ijo open tomo pi kasi kule loje. ni la, jan Jenka li toki e wile ni: o tawa tomo pi kasi kule loje. o anpa jan Tokuta. taso, jan musi li kama tomo ni la, jan Tokuta en jan pali ona li awen lon tomo. tan wawa pi leko Paluloku la, soweli Toloko li moku e kasi kule loje. pini la, jan Misali li pakala moli e soweli Kinku. jan musi o utala moli e soweli monsuta Toloko.

utala lon tomo pi kasi kule li pini la, jan Misali li pana wawa e jan musi tawa tomo Mekiju. jan Kali li lon tomo ni kin tan nasin sama. ni la, jan musi en jan Kali li alasa tawa weka tan tomo Mekiju. taso ona li ken ala tawa weka tan ni: kiwen suli li lon nasin pi tawa weka. leko Paluloku li pona tawa ona, li weka e kiwen suli. pini la, jan musi en jan Kali li tawa, li utala e pilin Kowa. tan wawa nasa pi pilin Kowa la, ma sewi li awen sewi. jan Tokuta li kama, li pini e utala, li weka e pilin Kowa, li awen sewi e ma sewi. utala li pini la, lupa pi pilin Kowa li kama jo ale e telo. ni la, jan ilo li ken kama moli. jan Kali li pana e poki kon tawa jan musi li awen e jan musi. tan ni la, ona li open moli. ken la, jan musi li ken awen e ona.

jan musi li weka tan telo la, ona li kama sin tawa ma tomo pi soweli Mimika. tenpo ni la, soweli Mimika ale li weka. jan Tokuta li lanpan jan e soweli ale. tomo pi sike akesi sin la, jan Kasuma li open e sike, li alasa tawa weka tan ma sewi. jan Kasuma li toki e ken ni: jan musi li ken tawa weka poka ona. ni la, jan musi en jan Kasuma li len lon nena mute, taso jan Tokuta li lawa wawa e ma ale. ni li pini ike pi musi ni. ante la, jan musi li ken awen utala e jan Tokuta. jan musi li ken pakala ale e pilin Kowa. ni la, soweli Mimika li ken ala kama monsuta.

jan musi li tawa sinpin selo pi ma sewi. tawa sewi sinpin selo la, ona li kama ma kasi suli. ma ni la, jan Tokuta li lawa e soweli Mimika. soweli Mimika li pali kasi, li suli e kasi kule loje mute. ma ni la, jan pali pi jan Tokuta li anpa e jan musi, li tomo awen e ona. tomo awen ni la, soweli Su li lon. jan musi li lape tan anpa la, jan ike li weka e jan Su tan tomo. taso, jan Su li pana e lipu tawa jan musi. lipu ni li toki e ni:

tenpo pini la, kulupu pi alasa sona li kama ma sewi. kulupu ni la, jan sama kulupu pi jan Su en jan sona Pusuta en jan Tokuta li lon. taso, jan Tokuta li alasa e len lawa Akuma. ni la, jan Tokuta li lawa wawa e kulupu pali jan. mama meli pi jan Su li jan Momolin Sakamoto, li len lon ma kasi, li alasa utala e jan Tokuta. jan musi li wile alasa e meli Sakamoto.

jan musi li awen e jan Kali tan telo la, lon ma kasi la, jan Kali li ken lon. ni la, jan musi li ken alasa e ijo, li ken kama sin e sona weka. ni la, jan Kali li sona sin e ale tan tenpo pini. nanpa wan la, jan musi li jan Kuto. nanpa tu la, ona tu li wile ala moli e soweli Mimika mute. ona li kama li wile pakala e len lawa Akuma. ni la, jan ike li ken ala kepeken e wawa nasa ona.

lon tomo len pi jan Momolin Sakamoto la, jan Momolin li alasa pali e supa pi tawa sewi. ni la, jan musi li ken tawa tomo pi jan Tokuta lon sewi. pini la, jan Kuto li utala e jan Misali, e jan Tokuta. jan Tokuta li pali e kiwen loje pi wawa nasa tan kasi kule loje. jan Kuto li moli e jan Tokuta, taso kon ona li awen lon tan kiwen wawa ni. kon Tokuta li lawa e pilin Kowa pi ma sewi, taso jan Kuto li moli e ona kin. ni la, ma sewi li open tawa anpa. ni la, jan Su en jan Kuto li tawa sewi wawa tan selo pi ma sewi. jan Kasuma li awen e ona tu kepeken akesi sewi ona. jan Momolin en jan pali Ito li tawa weka kepeken ilo tawa waso ona. jan en soweli ale lon ma sewi li weka ala, li tawa anpa wawa lon ma pi tawa anpa. ni li pini musi pi pona meso.

ante la, jan Kuto li kama sin e sona weka pi jan Kali la, jan musi li ken tawa tomo anpa. ni li tomo anpa musi sin. jan Kali li lon tomo ni. tomo ni li tomo awen pi jan Polosu pi wawa nasa. jan Polosu li mije sama pi jan Jenka. tenpo pini weka la, jan lawa li pilin ike tawa jan Polosu. ni la, jan lawa li tomo awen e ona, li pakala ike mute e ona. tan ni la, jan Polosu li kama nasa lawa ike, li pakala ale e ma tomo ona. ni la, jan Jenka li tomo awen e ona. tan wile pi jan Misali la, jan Polosu li pali e len lawa wawa Akuma. taso, len lawa wawa li jo e ike. jan li kama jo e len lawa la, jan Misali en leko Paluloku li wile pali tan wile jan ni. kin la, len lawa li ken ala kama pakala ale. ona li kama pakala la, ona li ken kama sin. nasin pakala wan taso li ni lon. jan Kuto en jan Kali li wile moli e jan Polosu.

jan Kuto en jan Kali li moli e jan Polosu la, ma sewi li pini e tawa anpa. soweli ale en jan ale lon ma sewi li moli ala. taso, jan Polosu li open moli la, ona li alasa moli e jan Kuto e jan Kali kepeken sinpin tawa. taso, ike pi len lawa li weka. jan ala li ken lawa wawa e jan Misali e leko Paluloku. ni la, leko Paluloku li awen e jan Kuto e jan Kali tan tomo. ona tu wan li tawa weka tan ma sewi li utala ala lon tenpo kama ale.

toki ante

nasin open ona li kama lon pini pi tenpo sike 2004, ni la, ona li ken lon toki Inli li ken lon toki Nijon. taso, insa pi tenpo sike 2024 la jan Pawasi en ante li toki pona e ona. suno pi toki pona 2024 la ona li pini e meso ona.