o tawa ijo lipu

musi Manwipa

tan lipu lipu Wikipesija
jan li pini musi Manwipa pi wawa mute.

musi Manwipa (toki Inli la: Minesweeper) li musi ilo. leko li lon musi. jan li ken pilin e leko. leko mute li pona, taso ilo pakala li lon leko lili. jan li wile alasa e leko pona ale e leko pakala ala. leko pona li pana e sona kepeken nanpa: leko pakala seme li lon poka pi leko pona? musi mute li ante lili e nasin pi musi Manwipa. musi mute la musi Manwipa li kipisi lili ona.

jan li sona pi pona ala e tan musi. kulupu Teleta la musi li kama tan kulupu Makoso,[1] taso kulupu Julokema la musi li kama tan kulupu Insensi Sowe.[2] jan Ke Sonson li pali e musi pi kulupu Makoso. toki ona la musi li kama ala tan kulupu Makoso li kama ala tan kulupu Insensi Sowe.

musi li jo e leko mute. leko li ken open ala li ken open li ken sitelen. leko ale li ken jo e ilo pakala. leko li open ala la, jan li ken pilin e leko ni. leko li sitelen la, sona jan la ilo pakala li ken lon.[3]

jan li pilin e leko pakala la, musi li pini. jan li pilin e leko pona la, leko li kama open li pana e nanpa pi leko pakala poka ale. leko li open li jo ala e leko pakala poka la, leko poka li open kin. jan li sitelen e leko la sona ona la leko li jo e ilo pakala. leko sitelen li awen kin leko pi open ala. jan li awen ken pilin e ona. ante musi la jan li pini alasa e leko pakala poka ale pi leko pona, leko poka ante li kama open.[3]

nasin mute la, jan li pilin nanpa wan e leko la leko li ken ala pakala. nasin ante kin la, leko poka pi leko pona ni li ken ala pakala kin.

musi li pana e sona nanpa pi leko pona la jan li ken kama sona e leko pona ante e nanpa ante. jan li ken lukin kin e nanpa pi ilo pakala ale pi sona ala. jan li sitelen e leko la ona li sona e ilo pakala. ni la, nanpa ala la nanpa ni li ken lili.

jan li open e leko pona ale la musi li pini pona. jan li wile e tenpo lili la ni li pona. nanpa pi leko ale anu nanpa pi leko pakala li kama suli la musi li kama wile e wawa mute. mute la, musi li ken wile e wawa tu wan: leko 8x8 anu 9x9 en ilo pakala 10 li wile e wawa lili. leko 16x16 en ilo pakala 40 li wile e wawa insa. leko 30x16 en ilo pakala 99 li wile e wawa mute. mute la jan li ken pana e nanpa ante kin.

jan li ante e musi Manwipa. ilo Manwipa X li sama musi pi kulupu Makoso li pana e nanpa mute li lon pona e ilo pakala. jan mute li wile musi pi tenpo lili la ona li musi Manwipa X.[2] musi Koman li jo e kulupu pi ilo pakala e leko nasa.[1] musi Pite li musi monsuta e musi Manwipa.[1] jan mute li pali e musi sama musi pi kulupu Makoso.

jan Sika li pali e musi Manwipa Q[4] li sama musi pi kulupu Makoso. jan li ken musi kepeken ilo lili pi kulupu esun Apelu. jan li ken sitelen pi tenpo lili e leko li ken ante e lukin musi. jan li ken kepeken ilo lili taso la jan li wile e tenpo lili la musi li ike.

musi Lunse li jo e musi Panwipa sama musi Manwipa. musi Pokemon wan la musi Manwipa li lon ma Nijon ala. tenpo suno musi pi tenpo sike 2015 la, musi Manka li jo e musi Mansipa sama musi Manwipa. ilo nanpa HP-48G la musi Mankan li lon. ona la jan o tawa tan monsi tawa sinpin o tawa ala ilo pakala. jan li alasa e nimi pi toki Inli lon ilo Kuko la jan li ken musi lon ona.

musi wan la leko pona lili li open. jan li ken ala pilin e leko ante o sitelen e leko pakala ale. ni la, jan li ken musi lon lipu taso. mute la, nasin wan taso li lon. tenpo pini la, ni li lon lipu pi kulupu Sawe Elan li musi Tentasu (toki Nijon la: 天体図, tentaizu).

utala la jan li wile e tenpo lili. ona li kama sona e nasin leko. lipu sama Minesweeper.info la tenpo pi jan ale li kama.[2] tenpo sike 2015 la kulupu Kine pi jan nanpa wan la jan Kami Mulaki li wile e tenpo lili nanpa wan.

  1. 1 2 3 https://www.techradar.com/news/gaming/the-most-successful-game-ever-a-history-of-minesweeper-596504
  2. 1 2 3 https://www.eurogamer.net/every-step-you-take-the-story-of-minesweeper
  3. 1 2 https://minesweepergame.com/strategy/how-to-play-minesweeper.php
  4. ↑ https://www.metacritic.com/game/minesweeper-q/details/
tan https://tok.wikipedia.org/w/index.php?title=musi_Manwipa&oldid=56319