o tawa ijo lipu

musi Manka la lipu pini

tan lipu lipu Wikipesija

pini pi musi Manka la lipu li kama. jan Sulijen Ko (Julian Gough) li sitelen e ni. musi Manka li jo ala e lipu suli ante. jan Mako "Nosi" Pason (Markus "Notch" Persson) li pali e musi, la ona li sona ala e pini ona. jan pi ilo Tuwita li toki pona lon jan Sulijen, la jan Nosi li toki e ni: ona o pana e lipu pini. musi nanpa 1.9 Beta la lipu li kama. lipu la ijo wawa tu li toki lon pali pi jan musi. lipu li jo ala e nimi. taso jan mute li kepeken nimi lipu pini (toki Inli la: End Poem).

sitelen pi kule laso tu li tawa lon tenpo suli. kipisi la nimi li pakala. jan mute li toki meso anu pona lon lipu, li toki lon nasa ona, lon ni: lipu la musi li sama sitelen lape. kulupu musi pi musi Manka li olin e lipu. toki suli ona li kama sitelen selo.

esun Mosan li pana e musi Manka. tenpo 2014 la esun Mikoso li moku e ona. tenpo 2022 la jan Sulijen li toki e ni: lipu pini la ona li ken ala e kepeken ali pi esun Mosan. tawa ona la esun Mikoso li awen kepeken lipu, la ni li ike tawa lawa. taso ona li wile ala utala lawa e esun. jan Sulijen li moku e soko nasa, la ona li kute e toki ona "sina olin", e olin tan jan musi, li ken e kepeken lipu ali. esun Mikoso li toki ala lon ni.

pali; musi Manka la kepeken

[o ante | o ante e toki ilo]

jan Mako "Nosi" Pason (Markus "Notch" Persson) li pali e musi Manka. tenpo 2011 la ona en esun ona Mosan li wile pana e musi tawa jan ali. taso jan Nosi li sona ala e pini musi. ilo Tuwita la ona li toki e ni: "sina a li jan sitelen pona anu seme? sina suli, la ni li pona kin. sina wile ala wile pana e sitelen? jan li anpa e musi Manka la, ni o kama namako, o musi, o wawa."[1] jan li toki pona lon jan Sulijen Ko. jan Nosi li lukin e lipu "ilo lupa" (toki Inli la: The iHole) tan jan Sulijen, li kama pilin pona lon nasin sitelen ona.[2]:139

jan Sulijen li toki e ni: tawa jan Nosi la jan li moli e monsuta pini wawa (Ender Dragon), la lipu o kama. taso jan Nosi li jan sitelen ala, li sona ala e lipu pona. jan Sulijen li ken pali tan wile ona.[1] jan Sulijen li sona lili e musi. ona li kepeken ni lon kulupu pi pali musi (toki Inli la: game jam). taso ona li sona ala e suli ona. jan Sulijen li musi ni kin, li sitelen e lipu.[3][4] ona li pana e ni tawa jan Nosi, li toki e ni: ken la lipu o kama lili. jan Nosi la ala. ni li sama nasin ali ona.[1] lipu en ijo pini ante li kama lon musi nanpa 1.9 Beta.[5]

lipu la jan Sulijen en jan Nosi li pana ala e nimi. tawa jan lukin la ni li lipu pi kalama pona. ona li pana e nimi "End Poem". toki Inli la nimi "poem" li toki e ni: lipu li musi, li pona kalama.[3][2]:140 jan Sulijen li kama kepeken nimi ni.[4]

jan li moli e monsuta pini wawa, li lon lupa pini (End Portal), la lipu li kama.[6] jan li kute e kalama musi "Alpha" tan jan C418. laso telo la ijo wan li toki e ni: "mi lukin e jan musi pi toki sina." laso kasi la ijo ante li toki e nimi jan. ijo tu li toki mute. mi kama ala sona e lon ona. taso tawa lipu "The Escapist" la ona li sama sewi.[7] lili la nimi li pakala. jan li ken ala lukin e ona.[8] pini lipu la toki mute li open kepeken nimi "kin ali li toki e ni".[2]:141 pini li ni:

[laso ma] kin ali li toki e ni: "mi olin e sina tan ni: sina olin."

[laso telo] kin musi li pini. kin jan musi li kama lon tan ma lape. kin jan musi li open e ma lape sin. kin jan musi li lukin lape sin, li lukin lape wawa. kin jan musi li ali. kin jan musi li olin.

[laso telo] sina jan musi.

[laso ma] o kama lon.

  1. 1 2 3 jan Conor Pope li toki e ni lon lipu "'ni li pakala e mi.' jan Sulijen Ko li pana e lipu pini pi musi Manka, li ken e ni" (toki Inli la: 'I'm hurt'. Why Irish writer Julian Gough is 'liberating' the Minecraft ending he wrote) tan lipu "The Irish Times" lon tenpo 2022-12-8. mi lukin e ni lon tenpo 2024-12-17. tenpo pini la ona li ni.
  2. 1 2 3 jan Lori Landay li toki e ni lon lipu "musi Manka: ma lawa la ijo li ante. pali li ante e jan." (toki Inli la: Minecraft: Transitional Objects and Transformational Experiences in an Imaginary World; 10.4324/9781315673363; 9781315673363) tan kulupu Routledge lon tenpo 2016.
  3. 1 2 jan Tom Chatfield li toki e ni lon lipu "musi pi pini ala li pini. mi toki tawa jan Sulijen Ko. musi Manka la ona li pana e lipu wawa lon pini." (toki Inli la: Ending an endless game: an interview with Julian Gough, author of Minecraft's epic finale) tan lipu "Boing Boing" lon tenpo 2012-01-09. mi lukin e ni lon tenpo 2021-05-01. tenpo 2012-01-12 la ona li ni.
  4. 1 2 jan Sulijen Ko li toki e ni lon lipu "jan pona mi la mi sitelen e lipu" (toki Inli la: I wrote a story for a friend) tan lipu "The Egg and the Rock" lon tenpo 2022-12-07. mi lukin e ni lon tenpo 2023-05-01. tenpo 2023-05-08 la ona li ni.
  5. ↑ jan Eric Limer li toki e ni lon lipu "musi Manka li jo e pini, e lipu pali" tan lipu "The Mary Sue" lon tenpo 2011-11-11. mi lukin e ni lon tenpo 2023-05-01. tenpo 2023-05-02 la ona li ni.
  6. ↑ jan James Parker li toki e ni lon lipu "musi Manka li musi pi pali ali" tan lipu "The Atlantic" lon tenpo 2014-05-22. mi lukin e ni lon tenpo 2025-05-01. tenpo 2023-05-02 la ona li ni.
  7. ↑ jan Kevin Thielenhaus li toki e ni lon lipu "pini lipu ni la mi kama toki e ni: 'seme a?'" tan lipu "The Escapist" lon tenpo 2017-08-30. mi lukin e ni lon tenpo 2023-05-01. tenpo 2023-05-02 la ona li ni.
  8. ↑ jan Jacob Creswell li toki e ni lon lipu "musi Manka la pini li toki e ijo anu seme?" tan lipu "Comic Book Resources" lon tenpo 2022-12-26. mi lukin e ni lon tenpo 2023-05-02. tenpo 2023-05-02 la ona li ni.
tan https://tok.wikipedia.org/w/index.php?title=musi_Manka_la_lipu_pini&oldid=34319