musi Wesi

musi Wesi (toki Sonko la: 围棋, weiqi, toki Nijon la: 囲碁, igo, toki Anku la: 바둑, baduk, toki Inli la: Go) li musi supa li musi sona. ona li tan ma Sonko. musi Wesi li wile e jan tu.

nasin musi

musi li wile e jan tu. jan nanpa wan li jo e kiwen pimeja mute. jan nanpa tu li jo e kiwen walo mute. musi li lon supa pi linja mute ni: ona li tawa nasin tu li kama wan lon ma mute sama leko. (mute la linja 19 li lon nasin wan, taso jan sin li ken musi lon supa pi suli ante.)

sike la jan pimeja en jan walo li pana e kiwen ona lon kama wan linja. kiwen li lon la jan li ken ala pana e kiwen lon ma sama. supa li kama sama a tenpo pini tan pana la pana ni li ken ala.

kiwen li jo e poka tu tu. kiwen pi kule sama li lon poka la ona li lon kulupu sama. (toki ni la kiwen wan kin li kulupu.) kiwen li lon poka ale pi kiwen kulupu ale la kulupu li kama weka.

jan li wile ala pana la ona li ken pana ala la jan ante li kama ken. jan ante kin li wile ala pana la musi li pini. jan li nanpa e kiwen ona e kon ni: ijo li lon ona li ken tawa lon kon taso la ona li ken tawa kiwen ona taso. jan pi nanpa suli li sewi.

lon ma mute

jan pi ma mute li musi Wesi. jan mute li musi lon ma Asija pi suno kama.