musi Sele

ike la lipu ni li lili. sina wile pona e ona la sina ken suli e ona.

sitelen poki pi musi Sele. jan Matelin li alasa jo e kili waso. wan Matelike li lon kon poka. jan Sijo li lon sinpin lukin pakala. kon Osilo en mama nena li lukin e jan Matelin.

musi Sele (Celeste) li musi ilo tawa. ona li tan jan Masi Toson (toki Inli la: Maddy Thorson) li tan jan Nowe Pewi (toki Inli la: Noel Berry) li tan jan ante kin. kalama li tan jan Lena Wen (toki Inli la: Lena Raine).

nasin musi

jan musi li tawa e jan Matelin (toki Inli la: Madeline). ona li ken tawa kon li ken tawa poka. (tawa sinpin en tawa monsi li lon ala.) ona li tawa lon tomo mute lon ma mute li alasa tawa sewi pi nena suli.

ona li ken luka e sinpin li ken tawa sewi kin ona, taso ni li moku e wawa ona. wawa li lon poka weka la jan li kama loje. wawa li weka ale la tawa sinpin li weka.

jan li lon kon la ona li ken tawa wawa tawa poka wile lon tenpo wan. ona li moku e kiwen suno la ona li ken ni sin. ona li kama wawa lon pini musi la ona li ken ni tu.

ma ante la ijo nasa ante li lon. ma nanpa wan la leko ilo li tawa lon ni: jan li luka e ona la ona li kama tawa. ma nanpa tu la leko mun li ni: jan li tawa wawa tawa insa ona la ona li awen tawa lon nasin sama. ma kama li ken kepeken ijo pi ma pini.

musi li utala wawa. ijo mute ni li lon: ona li moli e jan li pana e ona lon open tomo. jan li ken ala wawa ni la ona li ken kepeken nasin mama (toki Inli la: Assist Mode). nasin ni la jan li ken suli e tenpo tawa li ken wawa luka anu wawa tawa lon tenpo ale li ken moli ala. jan li wawa mute la ona li ken alasa jo e namako ni:

• kili li ken lon ale. jan li luka e ona li noka e ma la jan li moku e ona, taso ona li ma li moli la ona o jo sin e kili. kili li waso la jan li tawa wawa la ona li tawa sewi.
• pilin mani li lon tomo len. ona li open e lupa lon pini musi.
• poki kalama li lon tomo len. tomo ni la leko li kama li weka lon nasin kalama. jan li jo e poki kalama pi ma wan la ma ni nanpa B li kama. ma ni li sama ma nanpa A tawa lukin, taso wawa mute li wile.
• kili mani li lon open pi ma nanpa B. jan li ken moku e ona lon pini taso la ona o moli ala lon ale ma.
  • jan li pini e ma ale nanpa B la ma nanpa C li kama. ona li lili, taso jan li moli la ona li tawa ala open tomo li tawa open ma.

kama

jan li pali e toki ni la ona li lukin mute e lipu celeste.ink.

nimi ma pi toki pona li tan namako "nena mun".

open

open (toki Inli la: Prologue) la jan Matelin li kama lon noka nena tan ilo tawa. ona li tawa lon nasin pi kama pakala li kama lon tomo pi mama nena. mama li kute e wile nena pi jan Matelin e pilin ike ona pi nasin pakala la ona li anpa e ona li mu tan musi.

pini la jan Matelin li tawa anpa tawa lupa, taso ale li kama tawa ala. waso li kama li toki e nasin pi tawa wawa. ona la jan Matelin li weka tan lupa li awen tawa. toki suli li kama: "mi ken ni." (toki Inli la: You can do this.)

ma tomo pakala

ma tomo pakala (toki Inli la: Forsaken City) la jan Matelin li tawa lon ma tomo. sitelen esun mute li lon, taso jan li lon ala tomo.

ona li ken kama lon jan Sijo. jan ni li wile sitelen e ijo poka e ona sama.

jan Matelin li awen tawa li kama lon ma lape. sinpin toki li lon: "ni li sitelen e moli ale pi nasin ni" (toki Inli la: This memorial dedicated to those who perished on the climb).

ma pini

jan Matelin li weka tan lape la ijo li kama nasa. seli pi ma lape li kama laso. sewi li kama suno laso kin.

ma pini (toki Inli la: Old Site) la ona li kama lon sinpin lukin. kon ike pi sama ona li pakala e sinpin li tawa wawa tawa ona. ona tu li kama poka sina la kon li toki e ni: ona li wan pi jan Matelin. (nimi ante la ona li wan Matelike (Badeline).) ona li anpa e jan Matelin li toki e ni: ona li ken ala tawa sewi nena. sin la ona li kama tawa ona lon tenpo suli.

pini tawa la ona li toki ilo tawa jan olin pini ona. jan Matelin li toki e kama. jan ilo la ona li toki nasa. wan Matelike li kama sin. ilo li kama monsuta.

jan Matelin li weka tan lape monsuta li kama lukin e jan Sijo. ona li sitelen e ona e jan Matelin. sin la jan Matelin li tawa ilo li toki lon tawa mama ona.

tomo mun

jan Matelin li kama lon tomo mun (toki Inli la: Celestial Resort). ona li mu e ilo la kon Osilo (Mr. Oshiro) li kama li wile e ni: jan Matelin li awen lon tomo.

ona tu li tawa lon tomo. jan Matelin la tomo li pakala. tomo wan la len mute li lon ma ike. ona tu li pona e ni la jan Matelin li lukin e lipu toki. lipu la tomo mun li pini. jan Sijo kin li lon li alasa weka li toki e ni: jan Matelin o pali ala lon poka pi kon Osilo.

pilin pi kon Osilo li ike tan ike tomo la ko pimeja nasa li kama tan lawa ona. ko ni li lon ale tomo li lon open kin li moli e jan Matelin. ona tu li kama lon tomo sewi la jan Matelin li alasa pona e pilin ona li toki e ni pi lon ala: tomo sewi li wawa. awen la ona li wile weka la pilin pi kon Osilo li awen ike.

wan Matelike li kama tan sinpin lukin li anpa wawa e kon Osilo kepeken toki la kon li kama utala wawa e jan Matelin. pini la ona tu li weka la kon li anpa li wile wan taso.

ma kon

ma kon (toki Inli la: Golden Ridge) la jan Matelin en waso en mama nena li kama poka. mama nena la ni li nasa: jan Matelin li kama lon sewi ni. ona tu li toki pi kon Osilo. pini la mama li toki e ni: nena li lon e ijo tan insa jan e pilin ike pi jan Matelin. sin la ona li alasa pini e tawa pi jan Matelin li toki e nasin pi ma open, taso ona li wile ala ni li awen tawa.

jan li tawa sewi la kon li kama tawa wawa. pini la wawa li kama suli ni: jan Matelin li tawa open ona la ona li tawa lili a. kin pini la sike pi ko lete li utala e ona.

jan Matelin li kama lon ilo telo tawa la jan Sijo li kama tan sewi. ona tu li tawa poka ante pi telo suli kepeken ilo li toki pi kon Osilo. jan Sijo li sitelen e ona tu la ilo li pakala. wan Matelike li kama. jan Sijo li pakala namako e ilo la pilin pi jan Matelin li kama wawa ike. jan Sijo li alasa lape e ona li toki e nasin: ona o lukin pi insa lawa e lipu waso e tawa ona pi wawa lili. (jan musi o tawa pona e ona.) pilin li kama lape la ilo li kama pona li kama tawa sin.

tomo jasima

jan Sijo li kama lon tomo jasima (toki Inli la: Mirror Temple) (tomo pi sinpin lukin) li wile sitelen e ale. jan Matelin li wile ala lon tomo, taso ona li tawa sama ona. ona li lukin e jan Sijo ala e ilo ona taso.

tawa la jan Matelin li kama lukin e jan Sijo lon insa pi sinpin lukin. jan Sijo li alasa toki, taso ike li kama lon ona la ona li weka sin. jan Matelin li awen tawa lon tomo pi pimeja wawa.

wan Matelike li kama lon sinpin lukin li anpa toki sin e jan Matelin. jan Matelin li kama pilin ike li kama utala toki e ona. tawa la monsuta sike pi linja mute (toki Inli la: Seeker) li lon li utala e jan Matelin.

sinpin pini la jan Matelin li lukin e jan Matelin a. jan Matelin li anpa e ona sama, taso ona sinpin li toki e ni tawa ona lon: ona o awen alasa e jan Sijo. ona li lukin e ona lon insa kiwen. jan Matelin li ken ala pakala e kiwen la ona li tawa e ona. jan Sijo li toki lon tawa pi jan Matelin. pini la jan Sijo li kama lon sike lukin suli la ona li weka tan kiwen.

anpa ale

tenpo "anpa ale (toki Inli la: Reflection)" la jan tu li lape lon sike seli. tenpo pi pimeja wawa la jan Sijo li kama weka tan lape. pilin ona la sitelen ike li lon lape ona, taso ona li toki e ijo lon. jan Matelin li toki pi wan Matelike li toki pi pilin ike ona. jan Sijo li anpa ala e toki pi wan Matelike la jan Matelin li pilin nasa. jan Matelin li toki e ni: ona li wile weka e wan Matelike. jan Sijo la ona o weka ala e ona o pona e ona.

ona tu li toki e tan pi tawa nena e mama pi tomo jasima e ijo ante mute. pini la jan Matelin li lape. ma lape la ona li ken tawa sewi kepeken lipu waso jelo. sewi la ona li toki tawa wan Matelike li alasa weka e ona, taso wan Matelike li utala e ona li jo e ona kepeken linja monsuta. (kin poki toki li jo e sitelen ona la sitelen li weka tan pokijan li alasa lape e pilin kepeken nasin pi jan Sijo, taso wan li pakala e ni. jan Matelin li weka tan lape la ma pi noka ona li pakala la ona li tawa anpa weka.

jan Matelin li kama lon ilo pi tawa sewi. waso en mama nena li lon ona. pilin mama la jan Matelin li pini e tawa nena, taso jan Matelin li awen wile tawa. mama la wan Matelike li pilin e monsuta tan utala pi jan Matelin. mama la nena li pona e jan.

jan li kama lon wan Matelike li alasa toki pona tawa ona, taso ona li utala sin. wan li anpa lon utala la ona li wile weka, taso jan Matelin li wile pali lon poka ona. ona tu li kama wan. jan Matelin li kama ken tawa tu lon kon. wawa ni la ona li kama sin lon sewi. mama en jan Sijo li wawa e pilin ona e wile ona.

sewi ale

sewi ale (toki Inli la: The Summit) li pini pona e musi. ijo pi ma pini ale li lon ona. lipu li nanpa e sewi (sama musi open pi ilo Piko-8). wan Matelike li wawa e pilin pi jan Matelin. "sina ken ni."

ona tu li kama lon sewi ale nena li lukin e ma poka. wan Matelike li kama sona e ni: ona li wan pi jan Matelin la ona tu li weka tan nena la ona li ken ala lon sijelo. jan Matelin la ona li ken awen pana e pona lon pali. tenpo la ona li kama sin lon anpa.

pini

pini (toki Inli la: Epilogue) la utala li lon ala. jan Matelin li kama sin lon tomo pi mama nena. ona en jan Sijo en waso li lon li toki pona. kon Osilo kin li kama tan toki waso.

jan Matelin li pali e pan suwi kepeken kili ona. jan li kama jo e kili mute lon musi la pan li kama wawa tawa lukin tawa kulupu.

insa

tenpo sike wan li weka. jan Matelin en wan Matelike en mama nena li awen pona. mama li toki e ni: lupa li lon anpa nena. jan Matelin li wile kama lon insa (toki Inli la: Core). ona li kama la mama en waso li lon.

ma ni la jan Matelin li noka e ma la tawa kon ona li kama ala sin. ona o tawa ma sin anu o moku e kiwen suno anu o ijo ante. kama la sinpin li lon li wile e pilin mani tu tu. (jan li jo ala e ni la mama li toki e ni: pilin nena la wawa ona li pona ala. jan Matelin la nena li ken ala pilin. mama la pilin nena li sama ni: telo li tawa lon nasin la ona li "pilin" e ni: telo suli pini li lon seme.)

moli (namako)

moli (toki Inli la: Farewell) li lon namako li kama lon sike nanpa 2019.

sitelen pini la len kule en len tonsi li lon supa ilo pi jan Matelin. mama musi Masi Toson li toki e ni: jan Matelin li sona ala e meli ona lon open lon li kama sona. mama Masi kin li ni li sona ala e meli ona lon open pi pali musi. ona li kama sona lon pini li kama pilin e ni: jan Matelin li sama ona.

mama musi Masi Toson li toki e ni: jan Matelin li meli tonsi. ona li sona ala e ni lon open pali, taso ona li kama sona e tonsi pi ona sama la ona li kama sona e tonsi pi jan Matelin kin. len kule en len tonsi li lon sitelen pini pi namako "tawa pona".

pali

pali li open lon sike nanpa 2015. jan li pali e musi lili lon ilo Piko-8^(?) kepeken suno tu tu.

ona li pali sin suli e musi li pini e ona lon sike nanpa 2018.

namako "moli" li kama lon sike nanpa 2019 li pana e ma namako pi utala wawa lon pini musi.

kulupu

musi Sele li pona mute tawa jan mute.

jan mute li alasa pini e musi kepeken tenpo lili.

toki pona la

waso mu li toki pona e musi lon namako "nena mun". pipi pi walo pimeja li sitelen pona kin e ona.

lipu ante

• lipu open pi musi Sele
• lipu sona tan jan olin