meli

nasin lon la ijo o ken pana e sike mama, la ona li meli sijelo. ona li pana ala e ni tan nasa sijelo, la ona li awen meli sijelo tawa jan sona mute. jan la jan li kepeken kon nimi ni lon toki pi pona sijelo. taso tawa jan la ijo mute pi sijelo ala li ijo meli. ni li kule meli jan.

jan mute pi meli sijelo li meli kule. jan mute pi meli kule li meli sijelo. jan li meli sijelo, li meli kule ala, la tenpo mute la ni li mije tonsi anu tonsi pi kule ala. jan li meli kule, li meli sijelo ala, la tenpo mute la ni li meli tonsi. meli tonsi li ante e sijelo, la ona li ken meli sijelo kin. taso tenpo ni la ona li ken ala pana e sike mama. ken la ni li ante lon kama.

meli sijelo

jan en soweli en waso en kala en akesi en pipi en kasi en ijo ante li ken meli. mije sijelo li ante. kin sijelo li ken meli mije, li ken meli ala mije ala.

sijelo meli en sijelo mije en sijelo tonsi li ken ante. soweli en akesi en waso en kala en pipi la nasin mute meli li lon.

meli li ken kama e sin lili kepeken nasin ante mute ni:

soweli la meli li kama jo e telo unpa tan mije lon lupa mama ona. mama meli soweli li jo e soweli lili lon insa. ni la ona li kama suli. tenpo kama la soweli lili li kama tan insa, li kama lon.
tenpo mute la ijo lon meli li pana e sike mama. tenpo kama la ijo lili ona li pakala e sike mama, li kama lon tan ona.

meli soweli en meli jan la nena sijelo sinpin li pana e telo mama tawa soweli lili (anu jan lili). meli jan li jo e ni la ona, li jo e tu lon tenpo mute. meli soweli ante li jo e nanpa ante. telo ni li wawa, li pona, li suli e ijo lon lili.

lukin la meli li ken sama mije anu tonsi, li ken ante tan mije anu tonsi. meli li ken kule ante, li ken jo e linja ante, li ken jo e sijelo ante. mije anu tonsi la meli li ken suli, li ken lili.

jan

tenpo mute la sijelo meli jan li jo e lupa anpa pi ken mama, e nena sijelo sinpin tu, e kalama uta suwi.

meli mute li ken kama e jan sin tan insa pi sijelo ona kepeken nasin mama ona. taso meli lili li ken ala. meli majuna li ken ala. kin meli sijelo ante li ken ala tan nasa sijelo.

kala

selo la kala meli mute li sama mije.

waso

waso la meli li ken lili li ken kule mute ala.

sitelen ni la meli li lon sewi. mije li lon anpa.
meli li jo e kule lili. mije li jo e kule mute li suli lukin.
mije li jo e kule mute. meli li jo e kule lili.

pipi

pipi la meli en mije li ken ante lukin.

meli li walo.
mije li walo li jelo.

kule meli jan

jan la meli kule li toki e ni tawa kulupu: "mi meli". tenpo mute la ona li meli sijelo tan tenpo pi kama lon. taso tenpo ante la, ona li meli tonsi. ken la ona li meli e sijelo. ken la ala. ken la nimi "meli" li suli tawa ona. ken la ala.

kulupu jan en nasin jan

nasin meli li ante lon kulupu jan ante.

tenpo mute pi kama lon la kulupu li pana e jan sin lon kulupu meli anu kulupu mije. ni la tonsi li ken lon kulupu ike. ona li kama suli, la ona li ken ante e ni.

kulupu pi ma Elopa la meli mute li jo e linja lawa suli e len noka open e len kule mute. ni li nasin meli tawa kulupu ni. tenpo mute la kulupu li toki e ni tawa meli: "nasin wan li pona tawa meli. meli o wile e ni." taso tenpo ni la meli li ante e nasin ni, li kama jo e linja lili, e len noka linja, e len kule ala.

kulupu mute pi nasin sewi Isilan la meli o len e linja lawa anu lawa ale. jan ante li ken ala lukin e ni. taso kulupu ante la ala.

kin la kulupu li pana e sona ante tawa meli, tawa mije, li toki ala lon ken tonsi.

kulupu mute la nasin pi lawa mije li ike tawa meli. nasin pi wawa meli li alasa ante e ni.