ma tomo Pelin
| ma tomo Pelin
Berlin | |
|---|---|
| ma tomo lawa | |
 | |
| lukin pi ma tomo Pelin tan tomo linja sewi pi kama sewi | |
 len ma |
 sitelen lawa |
 | |
| ma suli | ma Tosi |
| ma lili | ma Pelin |
| jan lawa | jan Ke Wekene |
| mani | mani Elo |
| tenpo | UTC+1 |
| lipu ilo | http://www.berlin.de/en/ |
ma tomo Pelin (toki Tosi la: Berlin) li ma tomo lawa pi ma Tosi. ma Pelin la, ona li ma pi kulupu lawa. jan 3,700,000 li lon ma tomo Pelin. ma tomo ante lon ma Tosi li jo ala e jan pi mute ni, ma tomo Pelin li suli. kulupu Elopa (EU) la, ona li suli kin. ma tomo Pelin li jo kepeken poka ona e jan 4,700,000.
tenpo pini
[o ante | o ante e toki ilo]jan li sitelen pi nanpa wan e ma tomo Peli lon tenpo sike 1237. tenpo pini la, ma tomo Pelin li ma tomo lawa pi ma Pantenpuke (Brandenburg), li ma tomo lawa pi ma Pojesen (Königreich Preußen).
kepeken nimi "ma Tosi loje" la, mi toki e ma Tosi pi open suno, kepeken nimi "ma Tosi mani" la, mi toki e ma Tosi pi weka suno, lon kama.
utala suli nanpa tu li pini la, ma tomo Pelin li kipisi tu. kipisi pi ma Pelin pi open suno li ma tomo pi ma Tosi loje. kipisi pi ma Pelin pi weka suno li ma tomo pi ma Tosi mani, taso ona li insa ma Tosi loje. utala lete la, ma Tosi tu li pilin ike wawa tawa ona ante. ma Tosi loje li wile e ma tomo Pelin pi weka suno, taso ma Tosi mani li pana ale e ona. ma Tosi loje li toki tawa ma Tosi mani: "sina o kepeken ala e nasin lon ma mi. nasin tawa ma tomo Pelin ale li lon ma mi la, sina ken ala tawa ma tomo Pelin." jan ala li ken tawa ma tomo Pelin pi weka suno la, moku ala li ken tawa ona. taso jan li wile moku la, ma Tosi mani li pana e moku kepeken tomo tawa waso. ona li pana e kili lili pimeja pi telo weka tawa jan lili la, nimi ona li ilo utala pi kili lili pimeja, toki Tosi la, ona li "Rosinenbomber". tenpo sike wan li pini la, ma Tosi loje li toki: "sina ken tawa ma tomo Pelin pi weka suno". weka moku li pini a.
taso ma tomo Pelin li awen ma tomo tu. ma Tosi loje li lon kulupu pi ma Sesesele la, ona li jo e mani pi mute ala. ma Tosi mani li lon kulupu pi ma Mewika la, ona li jo e mani mute. jan tan ma Tosi loje mute li toki: "mi wile tawa ma Tosi mani a", ona li tawa ma Tosi mani. taso lawa pi ma Tosi loje li wile e ni: ona o awen. ona o tawa ala la, lawa pi ma Tosi loje li pali e tomo sinpin. sinpin ni li lon poka ale pi ma tomo Pelin pi weka suno li sike e ona. nimi ona li tomo sinpin Pelin, toki Tosi la, ona li "Berliner Mauer".