ma pi kulupu Sensine
ma pi kulupu Sensine (toki Inli la: North Sentinel Island) li ma lili lon ma Palata. kulupu jan Sensine li lon ma ni. jan ante li sona lili mute e pali ona e nasin ona e toki ona tan ni: suli la ona li wile ala toki tawa jan ante. tenpo ni la lawa pi ma Palata la jan ala pi ma ante li ken kama lon ma ni.
tenpo pini
[o ante | o ante e toki ilo]sike suno 1771 la tomo tawa telo tan ma Inli li tawa lon poka pi ma ni. sitelen ona la ona li lukin e suno lili mute lon ma, taso ona li kama ala lon ma li tawa weka lon tenpo lili.[1]
sike suno 1867 la tomo tawa Nenewe (Nineveh) li kama tan ma Palata li kama pakala lon poka pi ma ni. jan pi kulupu Sensine li open utala e jan pi tomo Nenewe lon suno mute. ona li moli e jan pi tomo Nenewe pi mute lili, taso jan mute li utala e kulupu Sensine kepeken kiwen la ona li awen lon li ken tawa weka.[1]
sike suno 1879/1880 la jan Mowi Wita Potan (toki Inli la: Maurice Vidal Portman) en kulupu ona li tawa ma ni li wile kama sona e nasin pi kulupu Sensine. taso kulupu Sensine li wile ala toki tawa ona. kulupu pi jan Potan li kama la kulupu Sensine li kama len lon kasi. taso jan Potan li awen alasa. kama la jan Potan li lukin e jan luka wan pi kulupu Sensine. jan tu li jan pi tenpo suli. jan tu tu ante li jan lili a. kulupu pi jan Potan li weka a e jan ale ni kepeken wawa ike, li tawa e ona kepeken tomo tawa telo. jan tu pi tenpo suli li kama moli kepeken tenpo lili. kin la jan lili tu tu li pilin ike suli lon sijelo. ni la kulupu pi jan Potan li pana sin e jan lili tawa ma ona.[1]
tenpo suli a la jan ala pi ma ante li kama lon ma ni. taso sike suno 1974 la kulupu li wile pali e sitelen tawa lon ma ni li wile toki tawa jan pi kulupu Sensine. nimi pi sitelen tawa ni li "jan li alasa lukin e jan (toki Inli la: Man in Search of Man)". ona li kama kepeken tomo tawa telo la jan pi kulupu Sensine li utala e ona kepeken palisa kon. palisa wan li pakala e selo noka pi jan wan. kulupu pi sitelen tawa li pana e moku e ijo lili musi lon ma li kama weka.[1]
sike suno 1981 la tomo tawa Pinwo (toki Inli la: Primrose) li kama pakala lon telo poka tan telo sewi wawa. jan pi kulupu Sensine li alasa utala e jan pi tomo Pinwo, taso telo sewi wawa la jan pi kulupu Sensine kin li ken ala kepeken tomo tawa telo ona. jan pi tomo Pinwo li tawa weka kepeken tomo tawa kon. tenpo kama la jan pi kulupu Sensine li kama jo e kiwen tan tomo pakala Pinwo.[1]
sike suno 1991 la kulupu lili tan ma Palata li alasa pana e moku tawa jan pi kulupu Sensine kepeken utala ala. ona li pana la jan ni li kama li utala ala li luka e moku ona, taso ona li tawa weka kepeken tenpo lili. kulupu lili ni li kama sin li pana sama e moku lon tenpo mute, taso ni li pini lon sike suno 1994.[1]
sike suno 2006 la jan tu li alasa e kala. tomo tawa ona li kama lon telo poka la jan pi kulupu Sensine li moli e ona tu.[2]
sike suno 2018 la jan San Alen Ta (toki Inli la: John Allen Chau) li kama tan ma Mewika li alasa pana e sona pi nasin sewi pi jan Jesu tawa jan pi kulupu Sensine. lawa pi ma Palata la ona o kama ala, taso ona li kama. jan pi kulupu Sensine li moli e ona.[2]
sike suno 2025 la jan Mikalo Witolowi Polako (Mykhailo Viktorovych Polyakov) li kama tan ma Mewika li alasa pali e sitelen tawa pi ilo Jutu lon ma ni. tenpo pini tu la ona li alasa tawa ma ni li ken ala, taso tenpo ni la ona li ken tawa. ona li lukin e jan ala pi kulupu Sensine. ona li mu, taso jan ala li kama. ni la ona li pana e moku e telo suwi li kama weka. jan ante li lukin e ona la jan ni li toki tawa lawa pi ma Palata. ni la lawa li pana e jan Polako tawa poki awen pi pali ike.[3]
tan sona
[o ante | o ante e toki ilo]- 1 2 3 4 5 6 ni li tan Goodheart. mi lukin e ni lon tenpo 2025-12-10.
- 1 2 ni li tan Why no one can visit North Sentinel Island – and why you shouldn’t try lon The Times of India lon tenpo 2025-04-09. mi lukin e ni lon tenpo 2025-12-10.
- ↑ Kaleena Fraga (en-US) li toki e ni lon American YouTuber Caught Trying To Contact The World’s Most Isolated Tribe — And He Left Them A Can Of Diet Coke lon tenpo 2025-04-07. mi lukin e ni lon tenpo 2025-12-10.