ma lawa Katula

ma lawa Katula Judicadu de Gaddura
ma lawa
sitelen lawa
ma tomo lawa	ma tomo Siwita
toki lawa	toki Satu toki Lasina
nasin sewi	nasin sewi Jesu Katolika
nasin lawa	ma pi jan lawa wan
tenpo open	tenpo sike nanpa 1020
tenpo pini	tenpo sike nanpa 1296

ma lawa Katula (toki Katula la: Judicadu de Gaddura) li ma lawa pi tenpo pini. tenpo ni la, ma ona li lon ma Italija.

ma lawa Tulese en ma lawa Apalele en ma lawa Kalali li lon poka ona.

tenpo

tenpo pi ma lawa Loma la, ma tomo Opija li jo e wawa esun suli; tomo tawa telo li tawa ona li tawa ma tomo Loma li tawa ma tomo Osita (Ostia). ma lon poka ona la, jan pi ma Kosika li lon.

tenpo sike nanpa 456 la, kulupu Wansili li open utala e ma tomo Opija, la ma ni li pini jo e wawa esun e jan mute. tenpo sike nanpa 543 la, jan lawa Jusinijanu pi ma Loma li utala e kulupu Wansili li lanpan e ma Opija. ma Loma li awen lawa e ma Sasinja.

ni la, kulupu Lakon en kulupu Kunale li lawa e ma Sasinja, ma li jo e jan lawa wan lon tenpo wan; ona li kepeken nimi Judike. tenpo sike nanpa 705 la, kulupu Alapi li open utala e ma Sasinja, la ma Sasinja en ma Loma li pini ken esun. ni la, tan kulupu lawa la, ma Sasinja li kama jo e kipisi lawa tu tu, kipisi wan li jo e jan lawa wan; ona tu tu kin li kepeken nimi Judike. kipisi wan ni li ma Katula.

ma Loma li pini lon la, utala li ken. ni la, kipisi tu tu ni li kama ma lawa tu tu. ma Katula li lon poka pi ma Kosika, li lon poka pi ma Italija, la ona li ken esun suli.

tenpo sike nanpa 1000 la, kulupu Alapi li open utala e ma Sasinja. tenpo sike nanpa 1016 la, ma Senowa en ma Pisa li weka e kulupu Alapi kepeken utala. tenpo sike 1073 la, jan lawa Gregorius pi nasin sewi Jesu Katolika li toki e ni: ona li lawa e ma Sasinja. toki ona la, tenpo nanpa wan la, jan li kepeken nimi Katula.

jan lawa

jan lawa la, ma ni li kepeken nimi Judike. jan lawa open la, jan li sona ala e nimi lon tenpo sin.

nimi pi toki pona	nimi pi toki ona	tenpo sike open	tenpo sike pini	sona ante
jan Manpeti Tan Katula	Manfredi de Gaddura	1020	1040	jan pi tenpo sin li sona e nimi la, ni li jan lawa nanpa wan. ken la, ona li tan ma Pisa.
jan Upatu nanpa wan	Ubaldu I	1040	1065
jan Kontantinu nanpa wan	Costantinu I	1065	1080
jan Tokito Tan Soli	Torchitorio de Zori	1080	1100	jan pi tenpo sin li sona e pali la, ni li jan lawa nanpa wan.
jan Satalo Tan Soli Kunale	Saltaro de Zori-Gunale	sona ala	sona ala	lipu pi tenpo sike nanpa 1113 la, jan li toki e ni: tomo pi jan lawa ni li lon ma tomo Siwita.
jan Itokole Tan Kunale	Ittocorre de Gunale	1100	1116
jan Kontantinu Panu nanpa tu	Costantinu II Spanu	1116	1133
jan Komita Panu	Comita Spanu	1133	1146
jan Kontantinu Tan Lakon Kunale nanpa tu wan	Costantinu III de Lacon-Gunale	1146	1170	tenpo ona la, jan li pali e tomo sewi San Sinpiso lon ma tomo Siwita.
jan Palisone Tan Lakon Kunale nanpa wan	Barisone I de Lacon-Gunale	1170	1203	ona la, kulupu Lakon Kunale li pini.
jan Elena	Elena	1203	1218	jan Lanpeto Wikonsi li mije olin ona.
jan Lanpeto Wikonsi	Lamberto Visconti	1218	1225	jan Elena li moli la, jan Lanpeto li kama jan lawa. ona li kama mije olin pi jan lawa Peneteta pi ma lawa Kalali.
jan Upato Wikonsi	Ubaldo Visconti	1225	1238	ona la, kulupu Lakon Wikonsi li pini.
jan Atelasija Tan Tulese	Adelasia di Torres	1238	1238	jan lawa Enso Tan Sewija li mije olin ona li lawa e ma Tulese e ma Kalula, la jan Antelasija li alasa lawa e ma Kalula. taso, wile pi jan Upato la, jan Sowani Wikonsi li kama lawa. jan Upato en jan Sowani la, mama mama li sama.
jan Sowani Wikonsi	Giovanni Visconti	1238	1275
jan Nino Wikonsi	Nino Visconti	1275	1296	ma Pisa li kama lawa e ma Katula la, ma lawa Katula li pini.