ma Nokan Wepalen

ma Nokan Wepalen Nordrhein-Westfalen
ma kipisi
len ma	sitelen lawa
ma Nolin Wesepalen
ma tomo lawa	ma tomo Tusito
ma suli	ma Tosi
toki lawa	toki Tosi
jan lawa	jan Ente Wi
mani	mani Elo
tenpo	UTC+1
lipu ilo	https://www.land.nrw/

ma Nokan Wepalen (toki Tosi la: Nordrhein-Westfalen /ˌnɔʁtʁaɪ̯nvɛstˈfaːlən/ [ˌnɔʁtʁaɪ̯nvɛstʰˈfaːln̩]) li ma kipisi pi ma Tosi. jan mute 18.000.000 li lon ma ona. ona la, ma kipisi ante pi ma Tosi li lili.

tenpo pini

tenpo pini la, ma Nokan Wepalen li lon ala. tenpo mute la, ma ona li ma kipisi tu: ma Wepalen (toki Tosi la: Westfalen) en ma Nokan (toki Tosi la: Nordrhein). tenpo 1946-08-23 la, ma Nokan en ma Wepalen li wan tan kulupu pi ma Juke. tenpo 1947-01-21 la, ma Lipe (toki Tosi la: Lippe) li pana tawa ma Wepalen. nimi pi pali ona li 'pali pi wan olin' (toki Inli la: Operation Marriage).

jan utala pi ma Juke li lon ma Wepalen, tenpo 1945-04

kulupu pi ma Juke li jo e ma Nokan Wepalen tan utala suli nanpa tu. taso: tenpo sike 1949 la, jan utala pi ma Juke li tawa weka. tenpo ona la, ma Nokan Wepalen li ma kipisi lon ma Tosi. tenpo ona la, ma Tosi li kipisi tu: ma Tosi pi pini suno (toki Tosi la: West-Deutschland/Bundesrepublik Deutschland) en ma Tosi pi open suno (toki Tosi la: Ost-Deutschland/Deutsche Demokratische Republik). ma Nokan Wepalen li lon ma Tosi pi pini suno.

tenpo 1990-10-03 la, ma Tosi tu li wan. tenpo ona la, ma Nokan Wepalen li ma kipisi pi ma Tosi wan.

nasin ma

nasin telo Kan (toki Tosi la: Rhein) en nasin telo Lipe (toki Tosi la: Lippe) li lon.

nasin lawa

jan lawa suli nanpa luka luka tu pi ma Nokan Wepalen li jan Ente Wi (toki Tosi la: Hendrik Wüst). jan ona li lon kulupu CDU.

ma tomo suli

ma tomo suli mute li lon ma Nokan Wepalen. nanpa jan la, ma tomo suli mute li ma tomo Kolon (toki Tosi la: Köln). taso: ma tomo lawa li ma tomo Tusito (toki Tosi la: Düsseldorf).

ma tomo suli suli li ni:

ma tomo	nanpa jan
ma tomo Kolon (toki Tosi la: Köln)	1 084 831
ma tomo Tusito (toki Tosi la: Düsseldorf)	629 047
ma tomo Tomun (toki Tosi la: Dortmund)	593 317
ma tomo Esen (toki Tosi la: Essen)	584 580
ma tomo Tusipu (toki Tosi la: Duisburg)	502 211
ma tomo Pokun (toki Tosi la: Bochum)	365 742
ma tomo Wipata (toki Tosi la: Wuppertal)	358 876
ma tomo Pilepe (toki Tosi la: Bielefeld)	338 332
ma tomo Pon (toki Tosi la: Bonn)	336 465
ma tomo Munsa (toki Tosi la: Münster)	320 946

|}