o tawa ijo lipu

utala pi ante suli pi ma Mewika

tan lipu lipu Wikipesija

jan Pal Leli (toki Inli: Paul Revere) li lukin e jan utala Piten kama. jan Leli li tawa jan mute li toki e ni: jan utula Piten li kama! utala li open lon ma tomo Lekinton (toki Inli: Lexington). ma tomo Kanko (toki Inli: Concord) li poka ma tomo Lekinton. jan pi ma tomo Kanko li jo e ilo moli li moli e jan utala Piten mute.[1]

ni li ike tawa jan lawa pi ma Piten. ona li pana e jan utala Piten sin mute.

jan utala Piten li pakala mute e jan utala Mewika. jan So Wasinton (toki Inli: George Washington) li lawa e kulupu utala Mewika. ona li sona mute li lawa pona e kulupu utala Mewika. taso kulupu utala Piten li wawa mute. jan Mewika li ken ala anpa e ona.

tenpo lete li kama. jan utala Mewika li jo ala e moku e len. kulupu utala Mewika li awen lon ma ante li utala e jan Piten. jan utala Mewika li pilin ike.

jan Toma Pen (toki Inli: Thomas Paine) li wile mute e ni: ma Mewika li anpa e jan Piten. toki pi jan Pin li kama e jan utala ni: jan utala Mewika li pilin pona.[2]

tenpo pimeja la jan utala Mewika li tawa jan utala Tosi. (jan utala Tosi li utala tan ni: jan lawa pi ma Piten li pana e mani tawa ona.) jan Tosi ni li nasa. jan utala Mewika li anpa e ona.

ni li pona mute tawa jan Mewika. jan Mewika li pilin e ni: "ken la mi mute li ken anpa e jan Piten." jan Mewika mute sin li wile utala.

jan utala Kanse li tawa ma Mewika. jan Piten li ike tawa jan Kanse. jan Kanse li utala lon ma Mewika tan ni. jan utala Kanse li pana e sona utala mute tawa jan utala Mewika. kulupu utala Mewika li kama wawa.

jan Konwali li lawa e kulupu utala Piten lon ma tomo Joketon (toki Inli la: Yorktown). jan utala Mewika mute li kama tawa ma ni. jan utala Piten li ken ala anpa e jan Mewika ni. jan Konwali li wile e ni: jan utala Piten li tawa weka tan jan utala Mewika. ona li tawa telo li lukin e ni: tomo tawa telo utala Kanse li awen lon telo. jan Konwali li ken ala tawa.[3]

jan Mewika li anpa e kulupu utala Piten. ni li pini e utala pi lawa Mewika.

  1. ↑ tomo lipu pi lawa Mewika. lukin pi tenpo mun nanpa 12, sike nanpa 2025. https://www.loc.gov/classroom-materials/united-states-history-primary-source-timeline/american-revolution-1763-1783/first-shots-of-war-1775/
  2. ↑ "Thomas Paine" lipu Britannica. tenpo pi mun nanpa 11 pi sike nanpa 2025. https://www.britannica.com/biography/Thomas-Paine
  3. ↑ tomo lipu pi lawa Mewika. lukin pi tenpo suno nanpa 1, mun nanpa 12, sike nanpa 2025. https://www.loc.gov/classroom-materials/united-states-history-primary-source-timeline/american-revolution-1763-1783/revolutionary-war-groping-toward-peace-1781-1783/
tan https://tok.wikipedia.org/w/index.php?title=utala_pi_ante_suli_pi_ma_Mewika&oldid=57082