lipu Wikipesija

sitelen pi lipu Wikipesjia la sitelen pi nasin sitelen ante li lon sike

lipu Wikipesija (toki Inli la: Wikipedia) li lipu sona open pi kulupu Wikimesija. pali kulupu la jan pi kulupu Wikipesija li sitelen e lipu ona kepeken ilo Mesijawiki pi nasin Wiki. jan Simi We en jan Lewi Sinka li pali e lipu lon tenpo sike nanpa 2001.

open la lipu Wikipesija li lon toki Inli. taso tenpo ni la jan li pali e lipu Wikipesija pi toki ante mute. lipu ilo ale la jan mute li kepeken lipu Wikipesija. jan mute pi ma ale li kepeken lipu Wikipesija lon toki ante mute.

tenpo pini

lipu Nupesija

tenpo pini la jan li lukin pali e lipu sona kulupu. ona mute li awen ala. lipu Nupesija (toki Inli la: Nupedia, "lipu sona sin") li lipu wan ni. ona li lipu sona open pi toki Inli. jan sona li sitelen e lipu kepeken nasin sona. kulupu Pami (toki Inli la: Bomis) li pali e lipu ni. jan Simi We li jan lawa pi kulupu Pami. jan Lewi Sinka li jan sitelen lawa. open la lipu Nupesija li lon nasin ken ona pi sona open. taso ona li kama lon nasin ken GNU pi lipu open (toki Inli la: GNU Free Documentation License). jan Simi We li wile e ni: jan ale li ken sitelen e lipu. jan Lewi Sinka li wile pali e ni kepeken nasin Wiki.

tenpo open pi lipu Wikipesija

tenpo sike nanpa 2001 la lipu Wikipedia li kama lon. tenpo ni la kulupu Pami li awen lawa e ona. open la lipu www.wikipedia.com pi toki Inli taso li lon. lipu pi toki ante li kama lon tenpo ante.

wile pi kulupu Pami lon tenpo open la pali ni li pali mani. taso lipu Wikipesija pi toki Epanja li wile ala e ni. ona li pali e lipu ante Enciclopedia Libre pi mani ala. ni la jan Simi We li toki e ni: lipu Wikipesija li pana ala e sitelen esun tan mani. ona li ante e nimi lipu tawa nimi www.wikipedia.org.

tenpo sike nanpa 2003 la kulupu jan Wikimesija li kama lon.

lipu Wikipesija pi toki pona

tenpo ale la, sitelen nanpa ni li mute lipu lon lipu Wikipesija.

lipu tokipona.wikipedia.org

tenpo pini la lipu Wikipesija pi toki pona li lon lipu tokipona.wikipedia.org. jan Sonja en jan kulupu pi toki pona li sitelen lon ona. taso kulupu Wikimesija li pini e ona.

lipu tokipona.wikipedia.org li kama pini la lipu li tawa lipu Wikicities. (tenpo ni la nimi lipu li lipu Fandom).

lipu wikipesija.org

kulupu lawa pi lipu Panton ale li ante e nasin ona li lawa e lipu ale. ni la jan kulupu li wile ante e lipu. lipu Wikipesija pi toki pona li kama tawa lipu wikipesija.org. lipu ni la jan sitelen li anpa ala tawa jan lawa pi lipu Panton.

lipu tok.wikipedia.org

toki pona li kama jo e nanpa toki pi kulupu ISO. lipu ale li wile e nanpa ni la ni li ken e toki pona lon lipu Wikipesija. jan kulupu pi toki pona li pana e wile pi lipu sin tawa jan lawa pi lipu Wikipesija. jan lawa pi lipu Wikipesija li ken e lipu Wikipesija pi toki pona. lipu wikipesija.org li tawa lipu sin tok.wikipesija.org.

lipu sama pi lipu sona Wikipesija

kulupu Wikimesija li jo e lipu sona Wikipesija e lipu sama mute. ona li wile pana e sona tawa jan mute lon toki mute.

nimi pi toki mute li lon lipu Wisonali. sona sin li lon lipu Wikiju. sitelen mute li lon lipu Komon. lipu toki mute li lon lipu Wikiso. toki mute li lon lipu Wikikote. lipu tenpo li lon lipu Wikinu. lipu tawa li lon lipu Wikiwajase. kulupu sona li lon ilo Wikitata.

jan li pali e lipu Ansakopesija. taso sona ona li sama lipu Wikipesija.