len noka anpa

len noka anpa li len e pini noka jan. tenpo mute a la, jan li jo e noka tu la, len noka anpa li kulupu pi len tu. tenpo lili la, sina ken esun e len noka anpa wan taso.

ijo pi len noka anpa

len noka li ken jo e ijo ni:

selo

tenpo mute la, selo pi len noka anpa li selo sijelo soweli. kin la, ona li ken len kasi li ken len tan kiwen pali.

linja

len anpa noka mute li jo e linja lon sewi pi selo ona. jan li wile insa e noka ona lon len la, ona o open e sike linja. linja li jo e sike linja la, noka li awen lon insa len. jan li wile pali e sike linja la, nasin mute li lon.

ken la, len noka anpa li jo ala e linja. ona li ken jo e ilo pi linja kiwen lili e len pi awen len ante.

supa

supa li lon anpa pi len noka anpa. ona li ken kiwen li ken ko. tenpo mute la, ona li jo e nena lili anu linja lili tan ni: telo anu jaki li lon ma, jan li wile awen lon noka, li wile ala tawa anpa.

kulupu pi len noka anpa

len noka anpa sewi

len noka anpa sewi li jo e selo suli. noka anpa la, len noka anpa sewi li tawa noka sewi. pona ona li ni: ona li awen pona e noka jan tan pakala. kin la, telo mute li ken lon ma la, ona li awen e noka jan tan telo. jan mute li kepeken ona tan pali anu tawa nena.

len noka anpa palisa

len noka anpa li ken jo e palisa lon supa ona. jan li kepeken len noka anpa palisa la, ona li kama sewi. tenpo mute la, jan meli li kepeken len ni, taso jan ale li ken. tawa noka kepeken len noka anpa palisa li ken ike la, jan li ken pakala e noka ona. tawa la, len noka anpa palisa li kalama.

len noka anpa supa

len noka anpa supa li jo ala e selo. ona li supa li linja taso. tenpo li seli la, jan mute li wile kepeken ona.

len noka anpa tawa

nasin tawa mute li lon la, len mute li lon kin

len noka anpa pi tawa wawa

jan li wile tawa wawa anu tawa pi weka suli la, ona li ken kepeken len ni. tenpo mute la, supa pi len noka anpa ni li ko li kiwen ala. kin la, jan tawa li wile e ni: wawa ona li kama ala weka. ni la, len o lili.

len noka anpa pi tawa nena

len ni li len noka anpa sewi. jan li tawa nena la, ona li wile e ni: noka ona li awen lon ma. kin la, ma nena li ken lete. ni la, selo pi len noka anpa o suli.

len noka anpa pi tawa musi

jan li wile tawa musi pi kalama musi la, ona li ken kepeken len noka anpa ni. len noka anpa pi tawa musi li jo ala e nena lili lon anpa supa ona.

len noka anpa pi tawa supa lon ko walo lete

len noka anpa ni li sewi. ilo tawa supa lon ko walo lete li jo e ilo awen pi len noka. nasin tu li lon:

jan li tawa kepeken supa wan: tenpo mute la, len noka anpa ni li kiwen lili.
jan li tawa kepeken supa tu: len noka anpa ni li kiwen a li jo e supa suli. ilo awen pi len noka li wile e supa ni.

len noka anpa pi tawa supa lon ko walo lete

len noka anpa pi sike noka

jan li wile musi e musi pi sike noka la, ona li ken kepeken len noka anpa pi sike noka. ona li sama len noka anpa pi tawa wawa li jo e nena lili lon anpa supa ona. jan li ante wawa e poka tawa ona la, ona li ken awen lon noka, li tawa anpa ala.

len noka anpa pi tawa sike

len noka anpa ni li jo e sike. jan li ken tawa wawa kepeken ona.

kepeken ona la, jan li ken tawa musi li ken musi e musi pi sike palisa.