leko

o lukin e nimi ni lon lipu nimi: nimi:leko

leko li sijelo lipu pi poka palisa anu sijelo tomo pi sinpin supa. mute la, jan li pali e ijo la, sijelo ijo li leko. ona li pona tan ni: jan li wile sona e suli selo ona e suli lipu ona e suli sijelo ona, ni li wile e pali pi lili mute a.

sijelo supa

leko lipu pona li lon insa sike.

leko lipu. ona li ken lipu leko pona li ken ni ala.

jan pi toki pona li kepeken nimi "leko supa" li kepeken nimi "leko lipu" tawa leko ni. nimi ni li toki e ni: ona li lon ale ma pi nasin tu.

leko supa pona

lipu suli: leko supa pona

leko supa pona li jo e poka tu tu. poka ale ona li palisa li suli sama. kin la, pini poka ale ona li sama. suli pi pini poka ona li pini poka leko.

poka wan ona li suli $s$ la:

• suli selo ona li suli $4s$.
• suli insa ona li suli $s^{2}$.

leko supa ante

lipu suli: leko supa

leko supa ante li jo e poka tu tu. ona li sama leko lipu pona; taso, ona li suli lon nasin wan li lili lon nasin ante. lipu leko pona ale li leko lipu, taso leko lipu pi ale ala li lipu leko pona.

ona li jo e suli tu lon nasin ante. suli wan li suli $\ell$ la, suli ante li suli $w$ la, leko lipu ni la:

• suli selo ona li suli $2\ell +2w$.
• suli insa ona li suli $\ell w$.

sijelo tomo

jan pi toki pona li kepeken nimi "leko sijelo" li kepeken nimi "leko tomo" tawa leko ni. nimi ni li toki e ni: ona li lon ale ma pi nasin tu.

leko sijelo pona

lipu suli: leko tomo pona

leko sijelo pona li jo e sinpin luka wan. sinpin ale ona li leko lipu pona. ale ma pi musi Manka li ni mute.

pini sinpin ona li suli $s$ la:

• suli selo ona li suli $6s^{2}$.
• suli insa ona li suli $s^{3}$.

leko sijelo ante

lipu suli: leko tomo

leko sijelo ante li jo e sinpin luka wan. ona en leko sijelo pona li ante sama ni: leko lipu pona en leko lipu ante li ante. sinpin ale ona li leko lipu.

ona li jo e suli tu wan lon nasin ante. suli tu wan ni li suli $\ell$ li suli $w$ li suli $h$ la:

• suli selo ona li suli $2\ell w+2wh+2\ell h$.
• suli insa ona li suli $\ell wh$.

pini poka

pini poka ni li leko.

sike wan la, suli pi pini poka leko li wan pi kipisi tu tu. jan li sitelen e leko lili lon ona la, jan li awen sona e ni.

ijo ante lon sona nanpa

jan ante li kepeken nimi "leko" tawa ni. toki pi lipu ni la, ona li ken sama ala leko, taso ona li sike ala li sama leko lon nasin mute.

• sijelo supa palisa
• sijelo tomo sinpin

ijo lon pi sijelo leko

• 
  leko Lupiko li ilo musi pi sijelo leko