ko suwi pipi
ko suwi pipi li ijo suwi. pipi jelo pimeja pi ko suwi li pali e ona. ona li pali e ni tawa pipi lili ona tawa moku ona. pipi li pali e ni: ona li moku e ko suwi kasi, li pana sin e moku ona. sin la, ona li ante e ko suwi kasi tawa ko suwi pipi.
pipi li awen e ko suwi lon tomo pipi ona. poki pi ko suwi la, ona li pali e ko poki pi ko suwi. pipi li pana e moku ona tawa poki ni.
jan kin li moku e ko suwi. jan li kama jo e ni tan tomo pipi. ni la, jan li pali e ni: pipi li awen lon tomo ona. jan li lawa e pipi li awen e tomo ona li kama jo e ko suwi ona. ni li pali pi suwi pipi. jan li pali e ni lon tenpo pi weka mute a. jan li kama jo e ko suwi la, ona li ken awen e ona tawa tenpo kama ale.
ko suwi li suwi tan ni: ona li jo mute e ko kiwen suwi.
pali pipi
[o ante | o ante e toki ilo]
pipi li weka tan tomo ona li alasa e kasi kule. kasi kule li pali e ko suwi kasi. ni li moku pipi. pipi li wile moku la, ona li alasa e kasi kule.
taso la, kasi kule li moli lon tenpo lete la, moku pipi li lon ala. taso kin la, pipi lili li ken ala weka tan tomo ona. ni la, pipi li ante e ko suwi kasi tawa ko suwi pipi. ona li ken awen e ko suwi pipi tawa tenpo lete li ken moku e pipi lili. tenpo lete la, pipi ale li moku e ko suwi pipi.
pali jan
[o ante | o ante e toki ilo]
jan li wile kama jo e ko suwi pipi tan ni: ona li suwi mute li pona tawa uta. taso, pakala tu li lon: pipi li awen e ko ona li jo e ilo utala lon monsi ona. kin la, jan li kama jo e ko suwi tan tomo pipi la, tomo pipi li kama pakala.
pakala nanpa wan la, jan li pona e ona kepeken nasin tu. nasin nanpa wan li kon seli. kon seli li nasa e lawa pipi, li weka e pilin utala ona. nasin nanpa tu li len. jan li len e sijelo ale ona la, pipi li ken ala pakala e ona.
tawa pona pi pakala nanpa tu la, jan li pali e tomo ante tawa pipi. tomo ni li jo e poki pi ko suwi mute. jan li ken weka e poki ni tan tomo pipi, li ken kama jo e ko suwi, li ken pana sin e poki tawa tomo. ni la, jan li pakala ala e tomo pipi li ken kama jo sin e ko suwi.