kala Mola Mola
kala Mola Mola (Mola mola) li kala pi kiwen insa. kala pi kiwen insa(?) ale la, ona li suli mute. ona li lon kulupu kala Mola (Mola) lon kulupu kala Molite (Molidae).[1] meso la suli linja ona li suli linja Meta 1.8. lili la, suli ona li ken suli ijo Kilokan 247. suli la, suli ona li ken suli ijo Kilokan 1000.
jan li lukin e kala Mola Mola pi suli nanpa wan lon ma Nusilan lon tenpo sike 2006. suli linja ona li suli linja Meta 3.3. suli ona li suli ijo Kilokan 2300.[2][3]
kala ante mute li ken ala pakala e kala Mola Mola, taso soweli Otaline(?) (Otariinae) en kala Okinusu Oka(?) (Orcinus orca) en kala Selakimopa(?) (Selachimorpha) li moku e ona. ma Anku en ma Nijon en ma Tawan la, jan li moku e kala Mola Mola. kulupu ma Elopa la, lawa ken li toki e ni: "jan li ken ala esun e moku pi kala Mola Mola. ijo li kama tan sijelo pi kala Mola Mola la, jan li ken ala esun e ni kin."[4] kulupu ma Elopa li toki e ni tan ni: sijelo pi kala Mola Mola li jo e jaki. jaki ni li ken pakala li ken moli e jan.
tenpo mute la, ilo awen kala(?) li poki e kala Mola Mola.
nimi
[o ante | o ante e toki ilo]nimi ona (Mola mola) li kama tan nimi mola tan toki Lasina. toki Lasina la, kon pi nimi mola li "kiwen pi pakala pan(?)".[5] kala ni li lukin sama kiwen pi pakala pan tan ni: sijelo ona li walo pimeja, li nena, li sike.[6]
nimi pi toki ante
[o ante | o ante e toki ilo]toki mute la, nimi ona li "kala mun" tan ni: sijelo ona li sike (sama mun). toki Elena ("φεγγαρόψαρο") en toki Epanja ("pez luna") en toki Italija ("Pesce luna") en toki Kanse ("Poisson lune") en toki Katala ("peix lluna") en toki Losi (рыба-луна) en toki Mosijo ("holdhal") en toki Netelan ("maanvis") en toki Nosiki ("månefisk") en toki Potuke (peixe lua) en toki Ukawina ("риба-місяць") li kepeken nimi ni. kin la toki Tosi li kepeken nimi "Schwimmender Kopf" (lawa pi tawa telo).
toki ante mute la, nimi ona li "kala nena". toki Netelan ("klompvis") en toki Sensa ("klumpfisk") en toki Sumi ("möhkäkala") en toki Tansi ("klumpfisk") li kepeken nimi ni.
toki Inli la, nimi ona li "sunfish" (kala suno) tan ni: tenpo mute la ona li tawa sewi pi telo suli, li awen lon suno.
toki Posuka la, nimi ona li "samogłów" (lawa taso) tan ni: ona li jo e linja monsi ala.
toki Sonko la, nimi ona li "翻車魚" (fān chē yú, kala lon poka ona).
pali en lon
[o ante | o ante e toki ilo]
kala Mola Mola meli li ken pana e sike mama tu wan ale ale ale ale (TWAAAA, 300,000,000) lon tenpo wan.[7] soweli pi palisa monsi(?) ale la, mute pi sike mama li nanpa wan.
kala Tunu(?) (Thunnus) en kala Kolipena Ipulu(?) (Coryphaena hippurus) li moku e kala lili pi kala Mola Mola. soweli Otaline(?) (Otariinae) en kala Okinusu Oka(?) (Orcinus orca) en kala Selakimopa(?) (Selachimorpha) li moku e kala suli pi kala Mola Mola. kala pi mute lili li ken pakala e kala Mola Mola tan ni: sijelo ona en selo ona li suli mute.
moku
[o ante | o ante e toki ilo]tenpo pini la, jan sona li pilin e ni: "kala Mola Mola li moku e kala ko taso". taso lon la, kala Mola Mola li ken moku e kala mute kin. ona li moku e kala lili e kala Tejusita(?) (Teuthida) e kala pi selo kiwen(?) (kala Kusejesa anu Crustacea) e kala ante pi palisa monsi ala(?).[7]
tan sona
[o ante | o ante e toki ilo]- ↑ lipu Fishbase li toki e ni lon ni (toki Inli la: Family Molidae - Molas or Ocean Sunfishes). mi lukin e ni lon tenpo 2026-03-29.
- ↑ jan Juliet Rowan li toki e ni lon ni (toki Inli la: Tropical sunfish visitor as big as a car) lon lipu The New Zealand Herald lon tenpo 2006-11-23. mi lukin e ni lon tenpo 2026-03-29.
- ↑ jan Craig R McClain en jan Meghan A Balk en jan Mark C Benfield en jan Trevor A Branch en jan Catherine Chen en jan James Cosgrove en jan Alistair DM Dove en jan Leo Gaskins en jan Rebecca R Helm en jan Frederick G Hochberg en jan Frank B Lee en jan Andrea Marshall en jan Steven E McMurray en jan Caroline Schanche en jan Shane N Stone en jan Andrew D Thaler li toki e ni lon ni (toki Inli la: Sizing ocean giants: patterns of intraspecific size variation in marine megafauna) lon tenpo 2015-01-13.
- ↑ kulupu ma Elopa li toki e ni lon ni (toki Inli la: Corrigendum to Regulation (EC) No 853/2004 of the European Parliament and of the Council of 29 April 2004 laying down specific hygiene rules for food of animal origin). mi lukin e ni lon tenpo 2026-03-29.
- ↑ jan Charlton T Lewis en jan Charles Short li toki e ni lon ni (toki Inli la: mŏla - A Latin Dictionary). mi lukin e ni lon tenpo 2026-03-29.
- ↑ jan Cristopher Scharpf li toki e ni lon ni (toki Inli la: Order TETRAODONTIFORMES: Families MOLIDAE, BALISTIDAE, MONACANTHIDAE, ARACANIDAE and OSTRACIIDAE) lon lipu The ETYFish Project lon tenpo 2025-07-02. mi lukin e ni lon tenpo 2026-03-29.
- 1 2 jan Brandon Griffin li toki e ni lon ni (toki Inli la: Mola mola (Ocean Sunfish)) lon lipu Animal Diversity Web. mi lukin e ni lon tenpo 2026-03-29.