jan sewi Wisilopoli
jan sewi Wisilopoli (toki Nawa la: Huītzilōpōchtli [wiːtsiloːˈpoːtʃtɬi], "waso lili tawa nasin pi waso lete") li jan sewi tan nasin sewi pi kulupu Mesika, li suli nanpa wan lon ona. ona li jan sewi pi mun suno, pi tenpo utala. kulupu jan sewi Tekalipoka(?) la, ona li jan Tekalipoka laso.
toki mama
[o ante | o ante e toki ilo]toki sewi la, jan sewi Ometekuli (toki Nawa la: Ometecuhtli) en jan sewi Omesiwali (toki Nawa la: Omecihuatl) li mama e lon. ni la, ona li mama e jan sewi tu tu. jan sewi ni li jan sewi Kesakowa (toki Nawa la: Quetzalcōātl), li jan sewi Sipe-Tote (toki Nawa la: Xīpe Totēc), li jan sewi Tekalipoka (toki Nawa la: Tēzcatlīpohca), li jan sewi Wisilopoli.[1]
toki sewi ante la, jan sewi Kojolisajuki (toki Nawa la: Coyolxauqui) li jan sewi mun. jan sama ona li tu tu ale li mun seli lon sewi. jan sewi Kowalikuwe (toki Nawa la: Coatlicue) li mama ona. taso, sike pi selo waso li tawa ona tan sewi la, ona li kama jo e jan sewi Wisilopoli lon insa pi sijelo ona. kulupu jan sama ona li wile moli e ona tan ni: jan sewi Misikowa (toki Nawa la: Mixcōhuātl) li mama mije ona ala. ni la, jan sewi Wisilopoli li kama tan sijelo pi mama ona la ona li jo e len utala li utala e jan sama ona, li moli e jan sewi Kojolisajuki. (toki ante poka la jan Wisilopoli li kama tan mama ona la ona Wisilopoli li jo ala e utala len, li kama jo e utala len kepeken tenpo lili.) ona li pakala e sijelo pi jan sewi Kojolisakuli, li kipisi e noka ona, li weka e ona tan nena ma Kowatepe (toki nawa la: Coatepec, "nena ma pi akesi linja"). ni la, jan sewi Wisilopoli li open alasa e jan sama ona. tan ni la mun suno li alasa e mun lon sewi pimeja.[1]
tan sona
[o ante | o ante e toki ilo]- 1 2 jan Kay Almere Read en jan Jason J. Gonzalez li toki e ni lon Mesoamerican Mythology: A Guide to the Gods, Heroes, Rituals, and Beliefs of Mexico and Central America lon Oxford Scholarship Online tan Oxford University Press lon tenpo 2023.