jan sewi Wesile

jan sewi Usile (toki Kuma: wsjr (nasin toki li sona ala); toki Metemenkemi: ⲟⲩⲥⲓⲣⲉ, Ousire /u.ˈsiː.ɾə/; toki Elena: Ὄσιρις, Ósiris) li jan sewi pi nasin sewi Kuma. ona li lawa e kasi e ken pi kama kasi e ken pi kama jan e moli e ma moli kama e kama lon tan moli. ona li jan lawa li jo e len pi jan moli. li jo e ilo tu lon luka ona li jo e len kiwen lawa pi ma Kuma seli. len kiwen lawa ona li jo e lipu tu pi waso suli. ona li jo e selo laso. ante la ona li jo e selo pimeja. mama mije ona li jan sewi Ke. mama meli ona li jan sewi Nu. jan sama mute ona li jan sewi Ese li jan sewi Sete li jan sewi Nipeho. kin la jan sewi Ese li meli ona.

jan Kuma mute li toki mute ala lon jan sewi Usile. taso jan pi ma Elena en jan pi ma Loma li toki mute lon ona. ona mute li toki e ni: jan Usile en jan Ese li jan lawa. jan sewi Sete li pilin ike. tan ni la ona li moli e jan sewi Usile li kipisi e sijelo pi jan sewi Usile. jan sewi Ese en jan sewi Nipeho li alasa e sijelo pi jan sewi Usile. jan sewi Ese li kama lukin e sijelo pi mije ona li wan e ona tan moli. jan sewi Ese li kama e jan lili. jan lili li jan sewi Olo. jan sewi Ese li awen e jan sewi Olo li suli e ona. jan sewi Olo li kama suli la tenpo suli la ona en jan sewi Sete li utala. utala pini la ijo tu li ken kama. nasin wan la jan sewi Olo en jan sewi Sete li kipisi e ma. jan wan li jo e kipisi. jan ante li jo e kipisi ante. nasin ante la jan sewi Olo li anpa e jan sewi Sete. nasin ale la awen li kama sin.

jan Alekanto suli li kama lawa e ma Kuma. jan Alekanto li moli la jan Tolemi li lawa e ma Kuma. ona li kama olin sewi e jan sewi Usile. open la jan li toki e ni: jan sewi Usile li jan sewi Tijoniso tan ni: ona tu li moli li kama lon tan moli. ante la jan li toki e ni: jan sewi Usile li jan sewi Hate tan ni: ona tu li lawa e moli. jan li kama pana e nimi Selapi tawa jan sewi Usile. nimi Selapi li wan e nimi Usile e nimi Hape. jan sewi Hape li soweli suli mije sewi. jan lawa mute pi nasin sewi pi jan Jesu li toki e ni: jan o olin sewi ala e jan sewi mute. nasin lawa o pini e ni. tan ni la jan li pini olin sewi e jan Usile e jan sewi Ese. ma tomo nanpa pini li pana e olin sewi tawa jan sewi Usile tawa jan sewi Ese. ma tomo ni li ma tomo Pila.

sitelen pi jan sewi Usile laso lon ma moli pi jan lawa Nepesisi
sitelen pi jan sewi Usile pimeja
sitelen kiwen pi jan sewi Usile
sitelen pi jan sewi Selapi