jan sewi Ese

jan sewi Lusa (toki Kuma: ꜣst /ˈ(ʀ/l)uː.saʔ/; toki Metemenkemi: Ⲏⲥⲉ, Ēse; toki Elena: Ἶσις, Îsis) li jan sewi pi nasin sewi Kuma. ona li lawa e pona silejo e wawa sewi e ken pi kama jan e kon mama meli. mama mije ona li jan sewi Ke. mama meli ona li jan sewi Nu. jan sama mute ona li jan sewi Wesile li jan sewi Sete li jan sewi Nipeho. mije ona li jan sewi Wesile. sitelen nimi ona li supa monsi pi jan lawa lon sitelen Kuma. jan pi mute lili li toki e ni: nimi pi jan sewi Lusa li kama tan nimi pi supa monsi. jan sewi Sete li moli e jan sewi Wesile la jan sewi Lusa en jan sewi Nipeho li alasa e jan sewi Wesile moli li lon e ona tan moli. jan sewi Lusa li kama jo e jan sewi lili Olo li awen e ona.

sitelen ona li sitelen Te. lukin la sitelen Te en sitelen An li sama. taso luka pi sitelen Te li anpa. lukin la jan sewi Lusa li meli li jo e kasi e sitelen An lon luka. len kiwen lawa ona li supa monsi pi jan lawa. jan sewi Lusa en jan sewi Nipeho li alasa e jan sewi Wesile moli li mu tan pilin ike tan ni. kute la mu meli pi pilin ike en mu waso li sama. tan ni la jan li sitelen e jan sewi Lusa e jan sewi Nipeho. tenpo la jan li sitelen e ona mute sama waso. tenpo la jan sewi Lusa li jo e luka waso tu. jan mute li toki e ni: jan sewi Esi en jan sewi Awijalu li sama. tan ni la jan sewi Lusa li kama jo e kon mute pi jan sewi Awijalu. ona li kama jo e ilo pi kalama musi e palisa lawa pi soweli e suno lon lawa.

jan Alekanto suli li anpa e ma Kuma la jan lawa Tolemi mute li lawa la jan Elena en jan Loma li kama pana e olin sewi tawa jan sewi Lusa e jan sewi Selapi. jan Selapi li jan sewi Wesile pi ma Elena. kin la jan li toki e ni: jan sewi Lusa li jan sewi Temete li jan sewi Aposite li jan sewi Pusapone. jan lawa mute pi nasin sewi Kolisu li pini e olin sewi pi jan sewi Lusa e olin sewi pi jan sewi Wesile.

sitelen pi jan sewi Lusa. ona li jo e luka waso.
sitelen Te
jan sewi Lusa en jan sewi lili Olo. jan sewi Lusa li jo e len kiwen lawa pi supa monsi.
sitelen kiwen pi jan sewi Lusa tan ma Loma