jan lawa

jan Juliju Kesali li jan lawa pi ma Loma

jan lawa li lawa e kulupu jan. jan lawa li toki tawa jan mute. jan lawa o pali e ijo suli mute.

lawa ma li jo e jan lawa. nasin ante la jan li kama jan lawa. jan Tana Tan li jan lawa pi ma Mewika. nasin wile pi jan lawa la jan Tana Tan li kama jan lawa. jan lawa Sa nanpa tu wan li jan lawa pi ma Juke. mama pi jan lawa Sa nanpa tu wan li jan lawa li moli la jan lawa Sa nanpa tu wan li kama jan lawa. ma ante la, jan li lanpan e lawa. jan Penito Musolini li lanpan e lawa pi ma Italija lon tenpo sike 1922.

kulupu ante kin li jo e jan lawa. jan Ilon Ma li jan lawa pi kulupu Tesa.

lawa ma li ken jo e jan lawa mute. jan lawa Sa nanpa tu wan li jan lawa mama pi ma Juke. jan Kija Sama li jan nanpa wan pi lawa ma. tenpo pini la, jan lawa mama li toki wile e jan nanpa wan pi lawa ma lon ma Juke. tenpo sin la, kulupu lawa anpa pi ma Juke li toki wile e jan nanpa wan pi lawa ma.

jan lawa li ike la, jan li ken weka e ona. utala anu utala ala la jan li ken weka e jan lawa. nasin wile pi jan lawa la, jan ale li toki e ni: jan seme o kama jan lawa. jan li jo e wile pi mute nanpa wan la, jan li kama lawa.

jan lawa mama

jan lawa Elisepe nanpa tu li jan lawa sewi pi ma Juke lon tenpo pini

jan lawa mama li lawa lon tenpo ale ona. ken la, ona li jan lawa sewi pi lipu lawa li jan lawa sewi pi wawa ale. jan lawa sewi li ken lawa e ma mute. jan lawa Sa nanpa tu wan li lawa e ma Juke e ma Kanata e ma ante. tenpo mute la, ona li pana e wawa tawa jan lili lon ona li moli. tenpo pini la, lawa ma mute mute li jo e jan lawa sewi.

jan lawa pi nasin sewi

jan lawa sewi pi ma tomo Loma li jan lawa pi nasin sewi Katolika

nasin sewi mute la, jan lawa li lon.