kulupu Ato Sowani Sakomo

kulupu Ato Sowani Sakomo Aldo, Giovanni e Giacomo
ma	ma Italija
pali	sitelen tawa musi
kulupu	jan Ato Pajo jan Sowani Tosi jan Sakomo Polesi

jan Ato Pajo (Aldo Baglio [ˈaldo ˈbaʎʎo]) en jan Sowani Tosi (Giovanni Storti [dʒoˈvanni ˈstɔrti]) en jan Sakomo Polesi (Giacomo Poretti [ˈdʒaːkomo poˈretti]) li jan musi li tan ma Italija, li pali e sitelen tawa musi. ona li kulupu la, nimi kulupu li nimi pi ona tu wan li nimi ni: kulupu Ato Sowani Sakomo (toki Italija la: Aldo, Giovanni e Giacomo, "jan Ato en jan Sowani en jan Sakomo"). musi pi sitelen ona li tan ni: jan pi ma Italija lete en jan pi ma Italija seli li jo e nasin ante.

tenpo pini

open kulupu

lon pi jan Ato li open lon ma tomo Palemo, taso ona li awen lon ona lon tenpo lili. ona li tawa ma tomo Milano, li kama sona e jan Sowani. jan Sowani li tan ma tomo Milano. ona tu li kama sona e tawa musi. ona li kama sona e toki musi pi kalama musi lon tomo sona Asenale (toki Italija la: Teatro Arsenale). ona tu li kama jo e lipu suli ni: ona li toki e ni: jan tu ni li sona suli e toki musi pi kalama musi. jan Sowani li kama jo e ona lon tenpo sike nanpa 1977, jan Ato li kama jo lon tenpo nanpa 1978. ona tu li pana e pilin musi tawa jan kepeken toki, li kama jo e mani kepeken nasin ni. ona tu li kama lon kulupu ni: kulupu li pali e sitelen tawa Professione Vacanze.

jan Sakomo kin li lon kulupu ni, li jo e lipu sona pi tomo Asenale. kin la, ona li jan pi sona sijelo. ona li pali tu ni lon tenpo sama.