o tawa ijo lipu

ilo tawa supa

lipu ni li lipu pona
tan lipu lipu Wikipesija
ilo tawa supa

ilo tawa supa li supa kasi li sike tu tu lon kipisi wan. jan li ken tawa kepeken ni. supa li lon nasin la, jan li lon sewi supa. jan li wile tawa la, ona li noka e nasin. kin la, jan li ken tawa kepeken nasin ni: ona li tawa poka e sijelo ona la ilo li kama tawa.

nasin mute la, jan li ken kepeken ilo ni. ken la, jan li wile tawa taso kepeken ilo. tenpo mute la, ona li wile musi kepeken ilo kin.

ilo tawa supa li jo e supa wan. supa ni la, ilo palisa tu li lon. ilo palisa wan li jo e sike tu la, ilo tawa supa li jo e sike tu tu.

supa li ken lukin pi nasin ante mute. ona li ken suli li ken lili. tenpo mute la sijelo supa li kiwen kasi. taso, kin la, ona li ken kiwen pali li ken kiwen ante.[1]

supa mute

tenpo mute la, sitelen li lon anpa supa. sewi supa la, lipu pi awen noka li lon. lipu ni li ni: noka sina li tawa la, ona li awen lon supa li kama poka ala.[2]

ilo palisa li lon anpa supa li jo e sike tu lon poka tu ona. palisa kiwen lili li awen e ilo palisa lon supa. ilo palisa li jo e ijo kiwen tu. insa pi ijo tu la, ijo ko lili li lon la, palisa li ken tawa poka. palisa li tawa poka la, ilo tawa supa li tawa sike.[3]

ilo palisa

sike tawa tu tu li lon ilo tawa supa. open la, sike li kiwen. taso tenpo ni la, ona li ko. pilin la ona li ken kiwen lili. insa sike li jo e ilo sike pi tawa sike. kin la, sike li ken lili li ken suli. sike li lili la, jan li ken tawa kon li ken tawa musi e ilo kepeken wawa lili. sike li suli la, jan li ken tawa kepeken tenpo lili.[4][5]

ilo tawa supa wawa

[o ante | o ante e toki ilo]

ilo tawa supa li ken jo e ilo wawa. ilo wawa li tawa e sike. ilo tawa supa pi wawa ala la, jan li noka e nasin. ilo tawa supa wawa la, jan li noka ala e nasin li luka e ilo.[6]

ilo tawa supa wawa

tenpo pini pi ilo tawa supa

[o ante | o ante e toki ilo]

open pi ilo tawa supa li kama lon tenpo ni: tenpo li insa e tenpo sike 1950 (LLLTTAMMLL) e tenpo sike 1960 (LLLTTAMMM). jan mute li wile e ni: ona li tawa supa lon nasin sama tawa supa telo. ni la, ona li weka e sike tan len noka anpa pi tawa sike li pana e sike ni tawa supa lili pi kiwen kasi.[3][7][8]

tenpo open pi ilo tawa supa la, kulupu Opi (toki Inli la: Hobie Skateboard Team) li suli mute.[9] jan Pesi Meki (toki Inli la: Patty McGee) li lon kulupu ni.[10]

tenpo poka la, kulupu Sepi (toki Inli la: Zephyr) li suli mute. jan pi kulupu ni li {nimi ijo|jan Tesi Pelata|Stacy Peralta|toki Inli}} li jan Sin Muli (toki Inli la: Jim Muir) li jan Peki Oki (toki Inli la: Peggy Oki) li jan ante. ona li toki e ni: nasin pona pi ilo tawa supa li sama nasin tan jan Leli Peteman (toki Inli la: Larry Bertleman) pi ilo tawa supa telo.[11] tenpo seli pi telo ala li kama lon ma Kaliponija la telo li weka tan poki telo suli sike. kulupu Sepi li open e nasin sin pi tawa supa. nasin ni la, jan li tawa lon poki telo ni.[12]

tenpo pini la, jan mute en kulupu mute pi ilo tawa supa li kama lon li pali e ilo sin li pali e nasin sin. tomo jan suli pi ilo tawa supa li pana e sona pi jan ni e sona pi kulupu ni.[13]

sitelen pi ilo tawa supa

[o ante | o ante e toki ilo]

lipu pi ilo tawa supa

[o ante | o ante e toki ilo]

lipu mute li toki e ilo tawa supa. tenpo la, lipu "the quarterly skateboarder" li open.[14]

tenpo ni la, ona li moli. lipu suli ante pi ilo tawa supa li lipu "Thrasher" li lipu "Transworld" li lipu "Big Brother". toki pi lipu ni li toki Inli. lipu pi ma mute li lon.[15][16]

sitelen tawa pi ilo tawa supa

[o ante | o ante e toki ilo]

sitelen tawa mute li pana lukin e ilo tawa supa. tenpo pini weka la, ilo pi pali sitelen tawa li suli a. ni la, jan pi ilo tawa supa li ken pali ike e sitelen tawa. tenpo wan la, kulupu Soni (toki Nijon la: ソニー株式会社) li pali e ilo "DCR-VX1000". pona la, ilo ni li lili la, jan mute li ken tawa e ilo ni li ken pali e sitelen tawa pi tawa supa.[17]

jan li pali e sitelen tawa pi ilo tawa supa

sitelen tawa pi tenpo open li sitelen "Skaterdater".[18]

sitelen tawa suli kin li sitelen tawa "Bones Brigade". jan mute li esun e sitelen ni la ona li kama sona e ilo tawa supa.[19]

ma pi ilo tawa supa

[o ante | o ante e toki ilo]

ma pi ilo tawa supa li jo e ijo mute tan ni: jan li ken tawa lon ona kepeken ilo tawa supa. ijo ni li ken nena li ken sinpin li ken lupa anpa li ken palisa li ken ante.[20]

sitelen:New halfpipe and vert wall at Norton Skatepark in North Yorkshire.jpg
ma pi ilo tawa supa li jo e ma sinpin sewi

pali pi ma ni li wile e mani mute. ken la, kulupu lawa li pana e mani ni. ante la, jan tawa li ken pali e ma kepeken mani ona, kepeken pali ona.

nasin pi ilo tawa supa

[o ante | o ante e toki ilo]

jan li ken tawa supa kepeken nasin mute. nasin ni li nasin suli:

tawa supa lon nasin pi ma tomo

[o ante | o ante e toki ilo]

nasin suli mute pi ilo tawa supa li ni: jan li tawa lon ma tomo. ma tomo li jo e ijo mute la, jan li ken tawa kepeken nasin mute. nasin pi tawa sewi li lon la, jan li ken tawa kon. nasin li jo e palisa la, supa li ken tawa lon sewi palisa. kin la, tawa li ken jo e nasin musi ni: jan anu supa li tawa sike lon kon. tawa kon la, jan li ken luka e ilo tawa supa ona. [21][20]

jan Eli Koton (toki Inli la: Eric Koston) li tawa lon palisa

jan Maki Waleli (toki Inli la: Mike Vallely) li jan suli pi nasin ni.[22]

jan Maki Waleli (toki Inli la: Mike Vallely)

tawa supa lon ma sinpin sewi

[o ante | o ante e toki ilo]

ma sinpin sewi li ma nasa pi ilo tawa supa. insa la, ona li supa. poka tu anu poka ale la, ona li sike li tawa sewi. ken la, ona li poki telo suli, taso telo li weka. jan li tawa lon ona la, jan ni li ken tawa kon sewi a. jan Toni Ko (toki Inli la: Tony Hawk) li jan suli pi nasin ni.[23]

jan Toni Ko (toki Inli la: Tony Hawk) li awen lon luka

tawa supa pi weka suli

[o ante | o ante e toki ilo]

nasin ni la, jan li tawa pi weka suli kepeken ilo tawa supa. nasin ni li wile e ni: ona li pona tawa sijelo jan.[24]

tawa supa lon nena

[o ante | o ante e toki ilo]

jan li tawa supa lon nasin nena, ona li ken tawa wawa a. ona li wile tawa wawa mute la ona li lili e sijelo ona.[25]

jan Juti Ojama (toki Inli la: Judi Oyama) li lili e sijelo ona tan tawa wawa

nasin li tawa poka la, ken la, jan o lili e wawa. ona li ken ni kepeken nasin mute:

  • nanpa wan la, jan li suli e sijelo ona sin. ni la, kon li lili e wawa ona.
  • nanpa tu la, jan li noka pi wawa lili e nasin. noka wan li awen lon supa. noka ante li tawa lon nasin li kama awen.
  • nanpa tu wan la, jan li tawa poka e supa. ni la, supa li tawa ala lon nasin sinpin ona li tawa lon nasin poka ona. sike li tawa lon nasin taso ona li tawa sike lili li kama awen. ken la, jan li luka e nasin tan ni: ona li wile ala tawa anpa. ni la, ona li wile e len luka kiwen.[26][27]
jan li tawa poka

tawa supa pi ante poka

[o ante | o ante e toki ilo]

tawa supa pi ante poka la, jan li tawa supa lon nasin utala. nasin utala li jo e sijelo sike lili mute. jan li tawa poka e sijelo wan la, ona o tawa poka ante e sijelo kama. ni la, ona li ante poka lon tenpo ale. jan li alasa e ni: ona li tawa kepeken tenpo lili li tawa weka ala e sijelo sike lili. nasin utala li ken nasin mute. weka pi sijelo lili tu li ken lili li ken suli.[28]

jan li tawa lon nasin utala

tawa supa lon monsi sijelo

[o ante | o ante e toki ilo]

nasin ni pi tawa supa la, jan li lon noka ala li lon monsi sijelo. ona li ken tawa anpa nena la, ona li kama tawa wawa. supa tawa li suli a.[29]

tawa supa lon monsi sijelo

pakala sijelo

[o ante | o ante e toki ilo]

tawa supa li ken pakala e sijelo. ni li ken tan ni:

  • ilo li kama pakala la, jan li kama anpa
  • ken pi jan tawa li lili la, ona li ken kama anpa
  • jan ante li pakala e jan tawa kepeken tomo tawa anu ilo sike tu tan lukin ala
  • jan tawa li tawa pi mute ike la, noka ona li ken kama pakala

open tawa la, jan li open e sijelo ona la, ken pakala li kama lili. kin la, jan mute li len e sijelo ona kepeken len kiwen. len kiwen lawa li suli a.[30]

utala musi mute pi ilo tawa supa li lon. tenpo mute la, jan mije li utala e jan mije ante taso la jan meli li utala e jan meli ante taso. kin la, jan tonsi li ken utala lon utala ni wan. utala musi pi tonsi taso li ken kin. kin la, utala musi pi jan ale li ken.

tenpo mute kin la, jan lili li utala e jan lili ante taso.

jan li ken jo e sijelo pakala. ken la, ona li jo e noka wan taso. ken la, ona li ken lukin ala anu ken lukin lili. ken la, pakala li ante. taso, ona li ken utala kin li ken tawa pona.[31]

musi utala Olinpi pi tenpo sike 2020 (MAM) la, tawa supa li open lon kulupu Olinpija.[32]

jan Peto Palo (toki Potuke la: Pedro Barros) li lon musi utala Olinpi
  1. ↑ Liu, H., Coote, T., Aiolos, & Charlie (2018). Skateboard deck materials selection. IOP Conference Series: Earth and Environmental Science, 128, 012170.
  2. ↑ (2003, Mar 5). The Evolution Of Griptape. Transworld Skateboarding. (n.d.). https://www.skateboarding.com/news/the-evolution-of-griptape
  3. 1 2 Alex. (2021, May 5). TKP trucks: history and quirks. Changing Angles. https://changingangles.com/2021/05/05/tkp-trucks-history-and-quirks/
  4. ↑ Todd. (n.d.). Frank Nasworthy. Skateboarding Hall of Fame and Museum. https://skateboardinghalloffame.org/shof-2012/frank-nasworthy-2012/
  5. ↑ Kimbel, C. (n.d.). Baldy Pipe: 1972 on clay wheels. Skateboarding Hall of Fame and Museum. https://skateboardinghalloffame.org/skateboarding-history-stories/baldy-pipe-1972-on-clay-wheels/
  6. ↑ Finkle, L.J. (1996). Remote control electric powered skateboard (U.S. Patent No. US5893425A). U.S. Patent and Trademark Office. https://patents.google.com/patent/US5893425A/en
  7. ↑ Emery, B. (2015, February 11). THE PREHISTORIC SKATEBOARD?. Jenkem. https://www.jenkemmag.com/home/2015/02/11/the-prehistoric-skateboard/
  8. ↑ Marcus, B., Griggi, L. D. (2021). The skateboard: The good, the Rad, and the gnarly: An illustrated history. MVP Books.
  9. ↑ America’s Newest Sport. (1966). [DVD]. United States.
  10. ↑ MP, L. (2024, October 18). Patti McGee, the world’s first professional women’s skateboarder, passed away. SurferToday. https://www.surfertoday.com/skateboarding/patti-mcgee-the-worlds-first-professional-womens-skateboarder
  11. ↑ Steve, C. (2018, September 8). The Z-Boys: The Skateboarding Pioneers of Dogtown. Liveabout. https://www.liveabout.com/the-true-story-of-dogtown-3002227
  12. ↑ Skateboarding in pools history. The Grom Life. (2023, October 10). https://thegromlife.com/skateboarding/skateboarding-in-pools-history/
  13. ↑ Museum. Skateboarding Hall of Fame and Museum. (n.d.). https://skateboardinghalloffame.org/museum/
  14. ↑ _Magazine Archive_. Skateboarding Heritage Foundation. (n.d.). https://www.skateboardingheritage.org/archive/vintage-magazines/quarterlyskateboarder/
  15. ↑ _Online Collection_. Skateboarding Hall of Fame and Museum. (n.d.-b). https://skateboardinghalloffame.org/online-collection/
  16. ↑ Templeton, E. (2013, October 30). _The First Covers of Iconic Skateboarding Magazines_. Complex. https://www.complex.com/sports/a/templeton-elliott/skateboard-magazine-first-covers-premiere-issue
  17. ↑ Trew, J. (2022, September 30). How Sony unintentionally defined the skate video. engadget. https://www.engadget.com/sony-vx1000-defined-the-skate-video-130032368.html
  18. ↑ MP, L. (n.d.). “Skaterdater”: the story of the world’s first skateboard movie. SurferToday. https://www.surfertoday.com/skateboarding/skaterdater-the-story-of-the-worlds-first-skateboard-movie
  19. ↑ About the movie. Bones Brigade. https://bonesbrigade.com/about/
  20. 1 2 _Park vs. Street Skateboarding: Exploring Skateboarding Styles_. ourextremesports. (2024, July 11). https://www.ourextremesports.com/archives/1297
  21. ↑ Goodfellow, E., Werner, D., & Yamaoda, T. (2005). _Street skateboarding: Flip tricks_. Tracks Pub.
  22. ↑ Davis, G. S. (n.d.). _Mike Vallely_. Skateboarding Hall of Fame and Museum. https://skateboardinghalloffame.org/shof-2021/mike-vallely-2021/
  23. ↑ Savage, J. (2005). Vert skating: Mastering the ramp. Capstone Press.
  24. ↑ SkateIDSAhttps://theidsa.org/pages/about
  25. ↑ How To: Tuck on a Longboard. Motion Boardshop.https://www.motionboardshop.com/pages/how-to-tucking-on-a-longboard
  26. ↑ How to Footbrake. Lush longboards.https://lushlongboards.com/how-to/footbrake/
  27. ↑ How to Coleman/Pendulum Slide. Lush longboards.https://lushlongboards.com/how-to/coleman-pendulum-slide/
  28. ↑ MP, L. (n.d.-b). _What is slalom skateboarding?_. SurferToday.https://www.surfertoday.com/skateboarding/what-is-slalom-skateboarding
  29. ↑ _The Thrill of Street Luge: How to do it?_. All Sport Rules. (2023, October 28).https://allsportrules.com/2023/10/28/the-thrill-of-street-luge-how-to-do-it/
  30. ↑ MP, L. (n.d.-b). # The most common skateboard injuries. SurferToday. https://www.surfertoday.com/skateboarding/the-most-common-injuries-in-skateboarding
  31. ↑ Smirnova, L. (2022, May 27). Blind skateboarder Mancina on mission to build world's first adaptive skatepark. Parasport. https://www.paralympic.org/para-sport/feature/blind-skateboarder-mancina-mission-build-world-s-first-adaptive-skatepark
  32. ↑ International Olympic Committee. (2016, August 03). IOC approves five new sports for Olympic Games Tokyo 2020. https://www.olympics.com/ioc/news/ioc-approves-five-new-sports-for-olympic-games-tokyo-2020


tan https://tok.wikipedia.org/w/index.php?title=ilo_tawa_supa&oldid=56008