ilo Sasipisi
ilo Sasipisi (toki Inli: ChatGPT) li ilo li ken toki sama jan. ilo ni li ken pali e kulupu nimi sin kepeken sona ona. ona li kama lon tenpo mun nanpa 11 pi tenpo sike nanpa 2022. ona li lukin e kulupu nimi tan jan la ona li pilin e ni: kulupu nimi seme o kama? kulupu nimi sin seme li pona tawa kulupu nimi jan? ni la ona li pana e kulupu nimi sin tawa jan.
tenpo lili la, jan mute li open kepeken ilo Sasipisi. ona li kama la tenpo mun tu li pini la jan mute mute li open kepeken ilo ni. kin la, jan mute li toki e ni: ilo ni la, ona li ken ante e pali sona anu seme?
ona li sona e ijo mute tan ni: jan li pali e ilo Sasipisi la, ona li pana e lipu mute e sona mute tawa ilo ni. ilo ni o kepeken nasin toki seme? jan li pana e sona ni tawa ilo Sasipisi.
suli la, ilo Sasipisi li ken pana e kulupu nimi pi lon ala. ni la, ona li pana e kulupu nimi la, jan o wile sona e ni: toki pi ilo ni la, toki ni li lon ala lon? jan li wile sona e ni la, ona o kepeken ilo ante sama ilo pi alasa sona o toki tawa jan ante.
tan ijo sama ni la jan mute li toki e pakala pi ilo ni.
toki Inli la, nimi "GPT" li tan kulupu nimi "Generative pre-trained transformer". kon pi nimi "Generative" la, ilo li ken pali e kulupu nimi sin e sitelen sin e kalama sin. kon pi nimi "Pre-trained" la, tenpo pini la ilo li kama sona kepeken ijo mute. ni la ilo ni li sona e ijo mute. taso, ilo li awen kama sona ala lon pini pi pali ona. nimi "Transformer" la ni li nasin. tenpo pini la nasin ni li lon ala la ilo sama ilo Sasipisi li lukin e kulupu nimi la ona li wile e tenpo mute. kin la, ilo li lukin e kulupu nimi mute la sona ona ni li weka: ilo li lukin e seme? jan li wile pona e ni la ona li pali e nasin "Transformer". nasin ni la ilo li lukin e kulupu nimi la ona li wile e tenpo lili. kin la, ona li lukin e kulupu nimi mute la sona ona pi kulupu nimi ni li weka ala kepeken tenpo lili.
tenpo lon la, jan li ken kepeken sona wawa nanpa 5.5 (GPT-5.5). sona wawa ni la ilo li ken lukin e sitelen, li ken kute e kalama.